16 ماۋسىم كۇنى تالعار قالاسىندا گاز-53 جۇك كولىگىنىڭ قاتىسۋىمەن جول-كولىك وقيعاسى بولدى، دەپ حابارلايدى «ادىرنا» ءتىلشىسى.
وبلىستىق پوليتسيا دەپارتامەنتى ءباسپاسوز قىزمەتىنىڭ مالىمدەۋىنشە، جۇرگىزۋشى رولگە يە بولا الماي، سادوۆايا كوشەسىندەگى ءۇيدىڭ قاقپاسىنا سوعىلىپ، ارتىنشا ونىڭ ءبىر قابىرعاسىنا بارىپ تىرەلگەن. اپات كەزىندە ۇيدە ەشكىم بولماعان.
«50 جاستاعى گاز-53 جۇرگىزۋشىسى زارداپ شەكتى، ول ءتۇرلى جاراقاتتارمەن وبلىستىق اۋرۋحاناعا جاتقىزىلدى. باسقا زارداپ شەككەندەر جوق»، - دەدى پوليتسيا.
اتالعان فاكت بويىنشا اكىمشىلىك قۇقىق بۇزۋشىلىق كودەكسىنىڭ 610-بابى، 2-بولىگى بويىنشا ءىس قوزعالدى.
