"قاراقالپاق - وزبەك قاتىناسىن ۋكراين - ورىس قاتىناسىمەن سالىستىرۋعا كەلمەيدى. "قولدايمىز" دەپ ۇمىتتەندىرىپ، ءوزى دە از ساندى قاراقالپاقتاردى ارانداتىپ الاسىزدار... بۇل ماسەلە تەك بۇۇ شەڭبەرىندە شەشىلۋى ءتيىس". بۇل پىكىردى بەلگىلى ۇستاز، تاريحشى ءومىر شىنىبەكۇلى Adyrna.kz تىلشىسىنە بەرگەن سۇحباتىندا ايتتى.
"بىلاي تارتساڭ وگىز ولەدى، ولاي تارتساڭ اربا سىنادى" دەگەن وسى. "قاراقالپاقتارعا كومەكتەسەيىك" دەپ جاتقان قىزۋقاندى اعايىندار ازداپ سابىرعا كەلسىن... قاراقالپاق - وزبەك قاتىناسىن ۋكراين - ورىس قاتىناسىمەن سالىستىرۋعا كەلمەيدى. "قولدايمىز" دەپ ۇمىتتەندىرىپ، ءوزى دە از ساندى قاراقالپاقتاردى ارانداتىپ الاسىزدار... قولىڭا قارۋ الىپ بارىپ، امان قايتساڭ ءوزىمىزدىڭ سوتپەن سوتتالاسىڭ", - دەيدى تاريحشى.
ءومىر شىنىبەكۇلىنىڭ ايتۋىنشا، ۋكرايناعا كومەكتەسكەن باتىس قاراقالپاق ءۇشىن باسىن اۋىرتپايدى.
"سوندىقتان، بۇل ماسەلە تەك بۇۇ شەڭبەرىندە شەشىلۋى ءتيىس. تىكەلەي تەكەتىرەسكە تۇسسە، "كوپ قورقىتادى، تەرەڭ باتىرادى" دەگەندەي وزبەكتەر قاراقالپاقتى جۋساتىپ سالادى. لنر، دنر دەگەندەردى مويىندامايتىنىن اشىق ايتقان قازاقستان بيلىگى بۇل ماسەلەدە تولىق نەيتراليتەت ساقتايتىنى بەلگىلى...", - دەيدى ءومىر شىنىبەكۇلى.
تاريحشى قازاقستاندىق الەۋمەتتىك جەلى بەلسەندىلەرى قىزۋقاندى قاراقالپاق جاستارىنىڭ ارتىنا جەل ۇرلەپ، ۇشىندىرا بەرمەگەنى ءجون دەيدى...
"بۇل ەڭ الدىمەن قاراقالپاق حالقى ءۇشىن پايدالى... ءيا، ازداپ ساۋاتى بار ادام رەتىندە قاراقالپاق حالقىنىڭ قالاۋىن تۇسىنەم... بىراق ءوز باسىم ونىڭ الاڭدا ەمەس، كەلىسسوزدەر ۇستەلىندە شەشىلگەنىن قالايمىن! بىراق قالاي بولعاندا دا بۇل جانجال قاراباقتاعى سوعىستان كەيىن باستارى بىرىگە باستاعان تۇركى حالىقتارىنىڭ ىنتىماعىنا سىزات تۇسىرەتىن بولدى...", - دەپ پىكىرىن ءبىلدىردى تاريحشى ءومىر شىنىبەكۇلى.
زارينا اشىربەك،
"ادىرنا" ۇلتتىق پورتالى
