وقۋ-اعارتۋ ءمينيسترى عاني بەيسەمباەۆ مۇعالىمدەردىڭ كاسىبي مىندەتىنە جاتپايتىن جۇمىستارعا تارتىلۋىنا قاتىستى مالىمدەمە جاسادى، دەپ حابارلايدى «ادىرنا» ءتىلشىسى.
«سىزدەر مەنىڭ ۇستانىمىمدى بىلەسىزدەر. مۇعالىم ۇستازدىقپەن، ياعني بالاعا ءبىلىم بەرۋمەن اينالىسۋى كەرەك. بۇعان نۇكتە قويىلۋى قاجەت. بۇل — زاڭمەن دە بەكىتىلگەن ماسەلە»،–دەدى ول ءماجىلىس كۋلۋارىندا.
ءمينيستردىڭ ايتۋىنشا، كەيبىر جەرگىلىكتى اكىمدىكتىڭ زاڭدى ەلەمەي، پەداگوگتەرگە تيەسىلى ەمەس مىندەتتەردى جۇكتەۋى – جول بەرۋگە بولمايتىن جاعداي.
«ەندى اكىمدىكتەر وسى ۇستانىمداردى جانە زاڭدى تولىققاندى ورىنداۋدى قولعا الۋى كەرەك. زاڭدى بۇزۋدى توقتاتۋ كەرەك»، – دەپ تولىقتىردى عاني بەيسەمباەۆ.
ەسكە سالايىق، بۇعان دەيىن قوستاناي قالاسىنىڭ اكىمى مارات جۇندىباەۆ 9-سىنىپ وقۋشىسى سۋعا كەتىپ قازا بولعاننان كەيىن، مۇعالىمدەردى رۇقسات ەتىلمەگەن جاعاجايلاردا رەيد جۇرگىزۋگە تارتۋدى ۇسىنعان. الايدا پەداگوگتەر شاھار باسشىسىنىڭ بۇل باستاماسىنا نارازىلىق بىلدىرگەن بولاتىن.
