قازاقستاندا جىل سايىن شىلدە ايىنىڭ العاشقى جەكسەنبىسىندە ۇلتتىق دومبىرا كۇنى اتاپ وتىلەدى. بيىل بۇل مەرەكە 6 شىلدەدە تويلانباق، دەپ حابارلايدى "ادىرنا" ءتىلشىسى.
2018 جىلى پرەزيدەنتتىڭ باستاماسىمەن بەكىتىلگەن بۇل مەرەكە ۇلتتىق بىرەگەيلىكتى نىعايتۋعا، جاستاردىڭ ءداستۇرلى مادەنيەتكە قىزىعۋشىلىعىن وياتۋعا جانە ۇرپاقتار ساباقتاستىعىن ناسيحاتتاۋعا باعىتتالعان.
قازاقستان رەسپۋبليكاسى مادەنيەت جانە اقپارات مينيسترلىگى وسى كۇنگە وراي رەسپۋبليكالىق ءىس-شارالار جوسپارىن بەكىتتى.
بيىل ەل كولەمىندە 300-گە جۋىق ءىس-شارا ۇيىمداستىرىلادى، ونىڭ 200-دەن استامى وڭىرلەردە جوسپارلانعان.
6 شىلدە كۇنى الماتى قالاسىنداعى MEGA Alma-Ata اشىق الاڭىندا قۇرمانعازى اتىنداعى قازاق ۇلتتىق حالىق اسپاپتارى وركەسترىنىڭ مەرەكەلىك كونتسەرتى وتەدى. سونىمەن قاتار
استاناداعى امفيتەاتر الاڭىندا ۇلتتىق دومبىرا كۇنىنە ارنالعان مەرەكەلىك كونتسەرت وتەدى.
قازاقستان رەسپۋبليكاسىنىڭ ۇلتتىق مۋزەيىندە كورنەكتى كومپوزيتور نۇرعيسا تىلەنديەۆتىڭ 100 جىلدىعىنا ارنالعان كونتسەرت ۇيىمداستىرىلادى.
جامبىل وبلىسىندا، «كونە تاراز» ارحەولوگيالىق ساياباعى اۋماعىندا «ۇلتتىق دومبىرا كۇنى – بابا ۇنىنە قۇرمەت» اتتى مۋزىكالىق كەش وتەدى.
تۇركىستاندا، «ازىرەت سۇلتان» تاريحي-مادەني مۋزەي-قورىعىنىڭ الاڭىندا «دومبىرا – داستان» اتتى مادەني-كوپشىلىك ءىس-شارا ۇيىمداستىرىلادى.
سونىمەن قاتار، ەلىمىزدە دومبىرا كۇنىنە وراي چەللەندج ءوتىپ جاتىر، وعان 100-گە جۋىق مادەنيەت سالاسىنىڭ كورنەكتى وكىلى قاتىسۋدا.
