پرەمەر-ءمينيستردىڭ ورىنباسارى، ۇلتتىق ەكونوميكا ءمينيسترى سەرىك جۇمانعارين ەت باعاسىنىڭ ۇزاق جىلدار بويى ارزان بولۋى مال شارۋاشىلىعىنىڭ دامۋىنا تەرىس اسەر ەتكەنىن ايتتى، دەپ حابارلايدى "ادىرنا" ۇلتتىق پورتالى.
باق وكىلدەرىنىڭ ساۋالىنا جاۋاپ بەرگەن ۆيتسە-پرەمەردىڭ سوزىنشە، نارىقتاعى ەتتىڭ باعاسى شارۋالاردى اسا قىزىقتىرماعان.
«ۇزاق جىل بويى ەت باعاسى 2500-2900 تەڭگە بولدى. بۇل مال شارۋاشىلىعىنا كەرى اسەرىن تيگىزدى. سەبەبى شارۋاشىلىقپەن اينالىسۋعا ەشكىمنىڭ ىنتاسى بولمادى. سول ءۇشىن باعا كوتەرىلدى. قازىر بۇل سالاعا ءبىراز ادام نازار اۋدارا باستادى»، — دەدى جۇمانعارين.
سونىمەن قاتار ول ەت باعاسى ارزانداي قويمايتىنىن، الايدا قازاقستان ىشكى نارىقتى تولىق قامتىپ، ەكسپورتقا دا شىعارا الاتىنىن اتاپ ءوتتى.
«قىرعىزستاندا ەت باعاسى ۇكىمەت تاراپىنان رەتتەلەدى. كەڭەس وداعىنىڭ وزگە ەلدەرىمەن سالىستىرعاندا قازاقستاندا باعا تومەن. مالشىلار كۇنى-ءتۇنى ەڭبەك ەتەدى، وتە اۋىر جۇمىس. ونداي ەڭبەكتىڭ باعاسى ارزان بولۋى مۇمكىن ەمەس»، — دەدى ول.
