ۇكىمەت وتىرىسىنداعى بريفينگ بارىسىندا دەنساۋلىق ساقتاۋ ءمينيسترى اقمارال ءالنازاروۆا اياق كيىمىنىڭ برەندى تۋرالى جۋرناليست سۇراعىنا جاۋاپ بەرۋدەن باس تارتتى، دەپ حابارلايدى «ادىرنا» ءتىلشىسى.
«جەلىدە ءسىزدىڭ اۋىلدارعا Valentino برەندىنىڭ اياق كيىمىمەن باراتىنىڭىز تالقىلانىپ جاتىر. بۇل شىنىمەن دە Valentino ما؟ ءسىز كيىمگە قانشا قاراجات جۇمسايسىز؟ ال جەدەل جاردەم دارىگەرلەرىنىڭ كيىمىنە قانشا قارجى بولىنەدى؟» – دەپ سۇرادى جۋرناليست.
الايدا مودەراتور بۇل سۇراقتىڭ جەكە سيپاتتا ەكەنىن ايتىپ، باسقا سۇراق قويۋىن ءوتىندى.
ءوز كەزەگىندە جۋرناليست كوپتەگەن قازاقستاندىقتىڭ نارازىلىعىن ەسكە سالدى. ايتۋىنشا، كوپشىلىك جەدەل جاردەم دارىگەرلەرىنىڭ ەسكى، توزعان كيىممەن جۇمىس ىستەيتىنىن، ال ءمينيستردىڭ ەسكى شەتەلدىك كولىكتىڭ باعاسىنداي تۋفلي كيىپ جۇرەتىنىن سىنعا الىپ جاتىر.
مينيستر تاراپىنان ەشقانداي رەاكتسيا بولعان جوق.
بۇعان دەيىن ءمينيستردى جەزقازعانعا جۇمىس ساپارى كەزىندە قىمبات كولىكپەن كەلگەنى ءۇشىن دە سىنعا العان بولاتىن. ال بۇل قالا تۇرعىندارى دارىگەرلەردىڭ جەتىسپەۋشىلىگىنە، ۇزىن-سونار كەزەككە جانە اۋرۋحانالارداعى ناشار جاعدايعا ءجيى شاعىمدانادى.
ايتا كەتەيىك، viled.kz سايتىندا Valentino تۋفليلەرىنىڭ باعاسى 700 مىڭ تەڭگەدەن باستالىپ، ءبىر ميلليون تەڭگەدەن اسادى.
