مەملەكەت باسشىسىنىڭ اۋقىمدى تسيفرلاندىرۋ جونىندەگى تاپسىرماسىن جۇزەگە اسىرۋ اياسىندا جاساندى ينتەللەكت جانە تسيفرلىق دامۋ مينيسترلىگى ۇلتتىق سۋپەركومپيۋتەرلىك كلاستەر رەسۋرستارىن پايدالانۋ بويىنشا ءوتىنىم بەرۋگە ارنالعان Alem.Cloud پلاتفورماسىن تانىستىردى. Alem.Cloud سۋپەركومپيۋتەرى الەمدەگى ەڭ قۋاتتى جۇيەلەردىڭ TOP-500 رەيتينگىنە ەنىپ، 86-ورىندى يەلەندى. بۇل ونىڭ وڭىردەگى ەڭ ءىرى ەسەپتەۋ ورتالىعى رەتىندەگى مارتەبەسىن راستايدى.
Alem.Cloud رەسۋرستارى ەندى زاڭدى تۇلعالارعا قولجەتىمدى. اتاپ ايتقاندا، مەملەكەتتىك ورگاندار، عىلىمي جانە ءبىلىم بەرۋ ۇيىمدارى، ستارتاپتار، جەكە كومپانيالار، سونداي-اق Astana Hub رەزيدەنتتەرى رەسۋرستاردى پايدالانا الادى. جاساندى ينتەللەكت جانە تسيفرلىق دامۋ مينيسترلىگى جاساندى ينتەللەكتىنى دامىتۋدىڭ ۇلتتىق مىندەتتەرى مەن جوبالاردىڭ ستراتەگيالىق ماڭىزىن ەسكەرە وتىرىپ، سۋپەركومپيۋتەر رەسۋرستارىن ءبولۋ ەرەجەلەرىن ازىرلەدى.
سۋپەركومپيۋتەردى پايدالانۋدىڭ باسىم باعىتتارىنا مەملەكەتتىك باسقارۋ، ءبىلىم بەرۋ، دەنساۋلىق ساقتاۋ، اۋىل شارۋاشىلىعى مەن سۋ رەسۋرستارى، مۇناي-گاز سالاسى، تاۋ-كەن مەتاللۋرگيا كەشەنى، ەنەرگەتيكا، گەولوگيا جانە بارلاۋ، كولىك پەن لوگيستيكا، ونەركاسىپ جانە قۇرىلىس، روبوتوتەحنيكا مەن دروندار، كيبەرقاۋىپسىزدىك، سونداي-اق قارجىلىق تەحنولوگيالار كىرەدى.
پلاتفورما ارقىلى ءوتىنىم بەرۋ ءۇشىن قولدانۋشى https://alem-cloud.nitec.kz/ سىلتەمەگە ءوتىپ، قاجەتتى رەسۋرستاردىڭ كولەمىن (GPU), CPU, RAM, SSD تاڭدايدى، سونداي-اق جالعا الۋ مەرزىمىن كورسەتەدى جانە جوبانىڭ سيپاتتاماسىن ەنگىزەدى. پلاتفورمادا قاجەتتى كونفيگۋراتسيانى ەسەپتەپ، قۇنىن شىعاراتىن ارنايى كالكۋلياتور قاراستىرىلعان. ءاربىر ءوتىنىم زاڭدى تۇلعانىڭ ەلەكتروندىق تسيفرلىق قولتاڭباسىمەن راستالادى.
ۇلتتىق سۋپەركومپيۋتەر ەسەپتەۋ رەسۋرستارىنىڭ تۇراقتى ءارى ۇزدىكسىز جۇمىسىن قامتاماسىز ەتەدى. قىزمەتتەر تاۋلىك بويى قولجەتىمدى، دەرەكتەر رەزەرۆتىك كوشىرمەلەرمەن قورعالعان، ال SLA تالاپتارىنىڭ ساقتالۋى جۇيەنىڭ قولجەتىمدىلىگى مەن تۇسىنىكتى بولۋىنا كەپىلدىك بەرەدى. بۇل كومپانيالار مەن ۇيىمدارعا ءوز جوبالارىن سەنىمدى تۇردە جوسپارلاپ، ءتيىمدى جۇزەگە اسىرۋعا كومەكتەسەدى.
TOP-500 رەيتينگىندە 86 ورىن قازاقستاننىڭ الەمدىك دەڭگەيدە قۋاتتى عىلىمي-تەحنولوگيالىق ينفراقۇرىلىمعا جانە ءوزىنىڭ AI-مودەلدەرىن دامىتۋ ءۇشىن ۇلكەن الەۋەتكە يە ەكەندىگىن راستايدى. بۇل ەلگە سەرپىندى زەرتتەۋلەر جۇرگىزۋگە، سونداي-اق بولاشاقتا تسيفرلىق قىزمەتتەر مەن تەحنولوگيالاردىڭ ەكسپورتىن ۇيىمداستىرۋعا مۇمكىندىك بەرەدى.
