ولجاس سۇلەيمەنوۆتى نوبەل سىيلىعىنا ۇسىنۋ تۋرالى «بايتاق» جاسىلدار پارتياسىنىڭ ەسەپتىك كونفەرەنتسياسىندا جاريالاندى.
و. سۇلەيمەنوۆتىڭ كەزىندەگى سەمەي يادرولىق پوليگونىن جانە باسقا ەلدەردەگى وسىنداي نىسانداردى جابۋ جولىنداعى كۇرەسى ەل ەسىندە.
ونىڭ باستاماسىمەن قۇرىلعان «نەۆادا – سەمەي» قوزعالىسى:
- سەمەي يادرولىق پوليگونىن جابۋعا شەشۋشى ىقپال ەتتى;
- يادرولىق قارۋدىڭ ادامزاتقا اكەلەتىن قاۋىپىن كەڭەستىك داۋىردە اشىق ايتۋعا باتىلدىق تانىتتى;
- يادرولىق سىناقتاردى توقتاتۋعا باعىتتالعان الەمدىك پىكىرتالاستارعا تۇرتكى بولدى.
بۇل ارەكەتتەر روتبلاتتىڭ، ICAN مەن IPPNW ۇيىمدارىنىڭ ەڭبەگىمەن تابيعاتى جاعىنان ءبىر دەڭگەيدە – يادرولىق قارۋدىڭ جويقىن كۇشىن توقتاتۋعا باعىتتالعان، ادامزات قاۋىپسىزدىگىنە ارنالعان قوزعالىستاردىڭ قاتارىندا بولدى.
«سەمەي يادرولىق پوليگونىن جابۋعا باستاماشى بولىپ، بۇل ىسكە شەشۋشى ۇلەس قوسقان تۇلعانىڭ ءبىرى – ولجاس سۇلەيمەنوۆ. ونىڭ باستاماسى مەن قازاقستان كوتەرگەن حالىقارالىق قوزعالىستىڭ ناتيجەسىندە الەمنىڭ بىرنەشە ەلىندە ءتورت ءىرى يادرولىق سىناق الاڭى، سونىڭ ىشىندە اقش-تاعى نەۆادا پوليگونى دا جابىلدى» -,دەيدى ازاماتحان ءامىرتاي.
مالىمدەمەدە، سونداي-اق، سۇلەيمەنوۆتىڭ انتيادرولىق باستاماسى بۇگىندە قايتا وزەكتى بولا تۇسكەنى اتاپ وتىلگەن، ويتكەنى ساراپشىلاردىڭ پايىمىنشا، سوڭعى ونجىلدىقتاردا يادرولىق سوعىس قاۋپى شىنىمەن دە كۇشەيگەن.
پارتيا نوبەل كوميتەتىنە رەسمي تۇردە جۇگىنۋ ءۇشىن الدىمەن پارلامەنت پەن ۇكىمەتتىڭ قولداۋىن الۋعا دايىندالىپ جاتىر.
انتيادرولىق قوزعالىستىڭ ءمانى قايتا ارتىپ وتىرعان قازىرگى كەزەڭدە سۇلەيمەنوۆتىڭ ەڭبەگىن حالىقارالىق دەڭگەيدە مويىنداۋ بۇرىنعىدان دا ماڭىزدى. نوبەل سىيلىعىنا ۇسىنىلۋى ونىڭ ادامزاتقا جاساعان ەڭبەگىن باعالاۋ عانا ەمەس، سونىمەن بىرگە الەم ەلدەرىنە يادرولىق قارۋدان تۇبەگەيلى باس تارتۋ تۋرالى جاڭا ۇندەۋ بولىپ تابىلادى.
ەگەر ولجاس سۇلەيمەنوۆتىڭ كانديداتۋراسى ماقۇلدانىپ، جەڭىسكە جەتسە، ول نوبەل سىيلىعىن العان تۇڭعىش دارا قازاق بولماق.
