ازەربايجان پرەزيدەنتى يلحام اليەۆ تاۋەلسىز مەملەكەتتەر دوستاستىعىنىڭ (تمد) بەيرەسمي سامميتىنە قاتىسپاۋ تۋرالى شەشىم قابىلدادى. بۇل قادام كرەمل ءۇشىن كۇتپەگەن جاعداي بولماعانىن رەسەي پرەزيدەنتىنىڭ ءباسپاسوز حاتشىسى دميتري پەسكوۆ مالىمدەدى، دەپ حابارلايدى «ادىرنا».
بۇعان دەيىن ازەرتادج اگەنتتىگى ازەربايجان باسشىسى جۇمىس كەستەسىنىڭ تىعىزدىعىنا بايلانىستى سانكت-پەتەربۋرگتەگى تمد-نىڭ بەيرەسمي سامميتىنە قاتىسا المايتىنىن حابارلاعان بولاتىن.
جۋرناليستەردىڭ «اليەۆتىڭ سامميتكە كەلمەيتىنى كرەمل ءۇشىن كۇتپەگەن جاعداي بولدى ما؟» دەگەن سۇراعىنا پەسكوۆ قىسقا جاۋاپ بەردى: «جوق».
ال وسى جيىندا ارمەنيا پرەمەر-ءمينيسترى نيكول پاشينيان جۇك ءترانزيتىن بۇعاتتاۋدان بوساتۋ جونىندەگى شەشىمى ءۇشىن ازەربايجانعا العىس بىلدىرگەن بولاتىن. بۇعان دەيىن ارمەنيا مەن ازەربايجان اراسىنداعى ارازدىققا رەسەي سەبەپشى بولعان دەپ سانالىپ كەلگەن. الايدا ارمەنيا مەن ازەربايجان امەريكانىڭ ارالاسۋىمەن تىكەلەي ءوز ماسەلەلەرىن وزدەرى شەشىپ، قاراباق داعدارىسىن رەتتەگەلى ماسكەۋدىڭ ورنى ەكىنشى ورىنعا سىرعىعانداي كورىنەتىن.
ايتا كەتەيىك، بەيرەسمي سامميت تاۋەلسىز مەملەكەتتەر دوستاستىعى ەلدەرى اراسىنداعى ساياسي ديالوگ پەن ىنتىماقتاستىقتى تالقىلاۋعا ارنالعان الاڭ رەتىندە وتكىزىلەدى. ازەربايجان پرەزيدەنتىنىڭ بۇل جولى جيىنعا قاتىسپاۋى رەسمي تۇردە تەك جۇمىس كەستەسىنە بايلانىستى دەپ ءتۇسىندىرىلىپ وتىر.
