«ايگولەك» بالالار جۋرنالىندا جاريالانعان ماتەريالدار قوعامدا قىزۋ پىكىرتالاس تۋدىردى، دەپ حابارلايدى "ادىرنا" ۇلتتىق پورتالى "ينفورمبيۋروعا" سىلتەپ.
بۇلدىرشىندەرگە ارنالعان باسىلىمدا «شايتاننىڭ الدامشى 12 ءسوزى»، «توزاق» سىندى تاقىرىپتاردىڭ جارىق كورۋى اقىن-جازۋشىلار تاراپىنان سىنعا ۇشىرادى.
جەلى قولدانۋشىلارى پايعامبار، شايتان، ءولىم مەن كۇنا جايلى ءدىني ادەبيەتتەردەن الىنعان ۇزىندىلەردىڭ بالالار پسيحولوگياسىنا اۋىر تيەتىنىنە الاڭداۋلى. قالامگەرلەر جۋرنال وقىرماندارىنىڭ جاس ەرەكشەلىگىن ەسكەرىپ، ءدىني تاقىرىپتاردى بالالىق شاققا ارالاستىرماۋ قاجەت ەكەنىن ايتادى.
اقىن داريعا نۇراشەۆا بۇل تۇرعىدا ءوز پىكىرىن ءبىلدىردى.
«بالانىڭ تۇسىنىگىنە اۋىر تاقىرىپ. انىعىن ايتقاندا، ءدىني مازمۇنداعى دۇنيە. مەنىڭ ويىمشا، ادام كامەلەت جاسقا تولعاننان كەيىن عانا مۇنداي تاقىرىپتى ءوزى تاڭداۋى كەرەك»، – دەدى ول.
جۋرنالدى اشىق سىنعا العان زيالى قاۋىم وكىلدەرى باسىلىم رەداكتسياسىنان رەسمي تۇسىندىرمە كۇتەتىنىن جەتكىزدى.
ال «ايگولەك» بالالار جۋرنالىنىڭ باس رەداكتورى قىمبات ابىلداقىزى داۋعا اينالعان ماتەريالدار پروفەسسور مىرزاكەلدى كەمەل مەن قالامقاس تەمىرباەۆا اۆتورلىعىنداعى «ونەگە» كىتابىنان الىنعانىن ايتتى. ونىڭ سوزىنشە، بۇل ماتەريالدار بالالار اراسىنداعى قاتىگەزدىك پەن قاستاندىقتىڭ الدىن الۋ ماقساتىندا جاريالانعان.
«بالالار اراسىندا قاتىگەزدىك جيىلەپ تۇرعان كەزدە جاس سانانى تىيىم ارقىلى تاربيەلەۋدىڭ ءبىر جولى وسى دەپ ويلادىق. ال جەلىدەگى پىكىرلەردى كورەالماۋشىلىق پەن جۋرنالعا جازىلۋ ناۋقانى كەزىندە اياقتان شالۋ دەپ قابىلدايمىن»، – دەدى باس رەداكتور.
قوعامدا تۋىنداعان داۋ ازىرگە باسىلماي، بالالارعا ارنالعان باسىلىمداردىڭ مازمۇنىنا قاتىستى جاۋاپكەرشىلىك ماسەلەسىن قايتا كۇن تارتىبىنە شىعاردى.
