پارلامەنت سەناتى توراعاسىنىڭ ورىنباسارى ولگا پەرەپەچينا جاڭا كونستيتۋتسيا قابىلداۋ ماسەلەسىن جالپىۇلتتىق رەفەرەندۋمعا شىعارۋدى ۇسىندى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، كونستيتۋتسيا جوباسىندا قۇرىلتايدى ىشكى ۇيىمداستىرۋعا، ونىڭ كوميتەتتەرى مەن كوميسسيالارىنىڭ قىزمەتىنە ەرەكشە ءمان بەرىلگەن.
«كونستيتۋتسيا جوباسىندا قۇرىلتايدى ىشتەن ۇيىمداستىرۋعا، ونىڭ ىشىندە ونداعى كوميتەتتەر مەن كوميسسيالاردىڭ قىزمەتىنە ايرىقشا ءمان بەرىلگەن. ولاردىڭ فۋنكتسياسىن كونستيتۋتسيا دەڭگەيىنە شىعارۋ پارلامەنت جۇيەسىن بەكەمدەۋدە ماڭىزدى قادام بولادى. قۇرىلتايدىڭ كوميتەتتەرى مەن كوميسسيالارى زاڭداردى ازىرلەپ، پىسىقتاۋدا، ساراپشىلىق قورىتىندى شىعارۋدا، پارلامەنتتىك باقىلاۋدا نەگىزگى ءرول وينايدى. ولاردىڭ مارتەبەسى مەن وكىلەتىن كونستيتۋتسيادا ايقىن بەكىتۋ زاڭ شىعارى پروتسەسىن اشىق ءارى ساپالى ەتەدى. پارلامەنتتىڭ ءبىر پالاتالى بولىپ وزگەرۋىنە بايلانىستى كوميسسيالاردىڭ وكىلەتى دە وزگەرتىلەدى. 59-باپتىڭ 1-تارماعى بويىنشا، قۇرىلتاي تۇراقتى كوميتەتتەردى قۇرادى. ولاردىڭ سانى كونستيتۋتسيالىق زاڭ مەن كوميسسيالار ارقىلى ايقىندالادى. 52-باپتىڭ 4-تارماعىندا قۇرىلتايدىڭ قىزمەتىن ۇيىمداستىرۋ، ونداعى دەپۋتاتتاردىڭ قۇقىقتىق مارتەبەسى كونستيتۋتسيالىق زاڭمەن ايقىندالاتىنى بەلگىلەنگەن»، – دەدى پەرەپەچينا.
سونداي-اق، ول جاڭا كونستيتۋتسيا جوباسىن قولداۋ ارقىلى حالىقتىڭ اتا زاڭعا دەگەن قىزىعۋشىلىعىن ەسكەرە وتىرىپ، ونى جالپىحالىقتىق داۋىسقا شىعارۋ ماڭىزدى ەكەنىن اتاپ ءوتتى.
"جاڭا كونستيتۋتسيانىڭ جوباسى وكىلدىك بيلىكتى كۇشەيتىپ، ازاماتتاردىڭ سەنىمىن ارتتىرۋعا، كەمەل پارلامەنتتىك مادەنيەت قالىپتاستىرۋعا باعىتتالعان. ازاماتتارىمىزدىڭ اتا زاڭ جوباسىنا دەگەن بەلسەندى قىزىعۋشىلىعىن ەسكەرە وتىرىپ، كونستيتۋتسيا قابىلداۋ ماسەلەسىن جالپىحالىقتىق رەفەرەندۋمعا شىعارۋ تۋرالى ۇسىنىسقا قولداۋ بىلدىرگىم كەلەدى. بۇل پروتسەدۋرا حالىق ەگەمەندىگى قاعيداتىنا سايكەس كەلەدى جانە قابىلداناتىن شەشىمنىڭ ايرىقشا ماڭىزدىلىعىن كورسەتەدى. بۇل كونستيتۋتسيا جوباسىن قولداۋ ارقىلى ءبىز ونىڭ ىسكە اسىرىلاتىنىنا جانە ەلدەگى پارلامەنتتىك جۇيەنىڭ ءارى قاراي دا داميتىنىنا جاۋاپكەرشىلىك ارقالاۋعا دايىن ەكەنىمىزدى راستايمىز", – دەدى دەپۋتات.
ايتا كەتەيىك، بۇعان دەيىن كونستيتۋتسيالىق رەفورما جونىندەگى كوميسسيانىڭ سەگىزىنشى وتىرىسىندا ءماجىلىس دەپۋتاتى، «Respublika» پارتياسىنىڭ جەتەكشىسى ايداربەك قوجانازاروۆ جاڭا كونستيتۋتسيانىڭ جوباسىن رەفەرەندۋمعا شىعارۋدى ۇسىنعان ەدى.
