بەلگىلى قازاقستاندىق ءانشى تورەعالي تورەالىنىڭ كونتسەرتتىك جانە گاسترولدىك قىزمەتى ۋاقىتشا توقتاتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى پروديۋسەر جان مۇقانوۆ رەسمي مالىمدەپ، ارنايى شەشىم شىققانعا دەيىن ونەرپازتىڭ ساحناعا شىقپايتىنىن حابارلادى.
پروديۋسەردىڭ ايتۋىنشا، مۇنداي شەشىمگە پاۆلودار قالاسىنداعى يپپودرومنىڭ رەسمي اشىلۋ سالتاناتىندا ءانشىنىڭ كەلىسىلگەن مىندەتتەمەلەرىن ورىنداماۋى سەبەپ بولعان. وسى جاعدايدان كەيىن الماتى قالاسىنىڭ كۇنىنە جوسپارلانعان كونتسەرتتەر مەن كۇزدە ءوتۋى ءتيىس حالىقارالىق گاسترولدىك تۋر تولىقتاي توقتاتىلعان. بۇدان بىلاي تورەعالي تورەالى ارنايى وكىم شىققانعا دەيىن كونتسەرتتەرگە، جەكە ءىس-شارالارعا جانە وزگە دە الاڭداردا ونەر كورسەتپەيدى.
سونىمەن قاتار، پروديۋسەر پاۆلودار وبلىسى مەن قالاسىنىڭ اكىمدىگىنە، مادەنيەت باسقارماسىنا، ۇيىمداستىرۋشىلارعا جانە كورەرمەندەرگە تۋىنداعان قولايسىزدىق ءۇشىن كەشىرىم سۇراپ، كەلتىرىلگەن شىعىنداردى وتەۋ جۇمىستارى باستالعانىن جەتكىزدى.
مالىمدەمەدە «تورەعالي تورەالى» برەندىن پايدالانۋ قۇقىعى دا ءسوز بولدى. كەلىسىمشارت تالاپتارىنا سايكەس، اتالعان برەندكە قاتىستى قۇقىقتار ازىرگە پروديۋسەرلىك ورتالىقتىڭ باقىلاۋىندا قالادى. جوسپارلانعان ءىس-شارالار بويىنشا بارلىق مىندەتتەمەلەر تولىق ورىندالمايىنشا، بۇل قۇقىقتاردى انشىگە قايتارۋ ماسەلەسى قارالمايدى.
سونداي-اق جان مۇقانوۆ شىمكەنت قالاسىندا وتكەن كونتسەرتتىڭ پروديۋسەرلىك ورتالىقپەن كەلىسىلمەگەنىن جانە رۇقساتسىز ۇيىمداستىرىلعانىن ايتتى.
ايتا كەتەيىك، بۇعان دەيىن تورەعالي تورەالى الماتىداعى ورتالىق ستاديوندا وتكەن «قايرات» پەن «قىزىلجار» فۋتبول كلۋبتارىنىڭ ماتچى كەزىندە كورسەتكەن ارەكەتى ءۇشىن دە قوعامنىڭ قىزۋ تالقىسىنا تۇسكەن ەدى.
