2026 جىلدىڭ 25 تامىزىنان باستاپ ەلەكترساموكاتپەن تروتۋارلاردا جۇرۋگە تىيىم سالىنادى، دەپ حابارلايدى “ادىرنا” ۇلتتىق پورتالى.
ماسەلەگە قاتىستى جاڭا زاڭ قابىلداندى.
اتالعان تالاپتى بۇزعان ازاماتتارعا 2 ايلىق ەسەپتىك كورسەتكىش (8 650 تەڭگە) مولشەرىندە اكىمشىلىك ايىپپۇل قاراستىرىلعان.
ەلەكترساموكاتتاردىڭ جاياۋ جۇرگىنشىلەردىڭ قاۋىپسىزدىگىنە قاتەر توندىرۋىنە بايلانىستى ولاردى تروتۋارلاردان شىعارۋ ماسەلەسى بۇعان دەيىن دە قوعامدىق تالقىلاۋدا بولعان. بۇل باستاما جارتى جىل بۇرىن ءماجىلىس دەپۋتاتتارىنىڭ قاراۋىنا ۇسىنىلعان ەدى.
وسىعان دەيىن «جول ءجۇرىسى تۋرالى» زاڭنىڭ 57-بابىنا سايكەس ەلەكترساموكات جۇرگىزۋشىلەرى الدىمەن ۆەلوسيپەد جولىمەن نەمەسە ۆەلوسيپەد جولاعىمەن قوزعالۋعا مىندەتتى بولاتىن. ەگەر مۇنداي جولدار بولماسا، ولار جولدىڭ وڭ جاق جيەگىمەن، قوعامدىق كولىككە ارنالعان جولاقپەن، جول جيەگىمەن نەمەسە جاياۋ جۇرگىنشىلەرگە قاۋىپ توندىرمەي، ساعاتىنا 6 شاقىرىمنان اسپايتىن جىلدامدىقپەن تروتۋار ارقىلى جۇرۋگە قۇقىلى ەدى.
جاڭا وزگەرىستەرگە سايكەس، تروتۋاردا جۇرۋگە رۇقسات بەرەتىن نورما زاڭنان الىنىپ تاستالدى. زاڭنىڭ بۇل بولىگى رەسمي جاريالانعان كۇننەن باستاپ 60 كۇن وتكەن سوڭ، ياعني 2026 جىلعى 25 تامىزدا كۇشىنە ەنەدى.
ەلەكترساموكاتتار مەملەكەتتىك تىركەۋگە جاتپايتىندىقتان، جەكە مەنشىك كولىك قۇرالدارىنىڭ يەلەرىن انىقتاۋ پوليتسيا قىزمەتكەرلەرى قۇقىق بۇزۋشىنى تىكەلەي توقتاتقان جاعدايدا عانا مۇمكىن بولادى.
سونىمەن قاتار، 2026 جىلعى 1 شىلدەدەن باستاپ جالعا بەرىلەتىن (كيكشەرينگ) ەلەكترساموكاتتارعا قوسىمشا تالاپتار ەنگىزىلەدى. اتاپ ايتقاندا، ولار تەحنيكالىق بايقاۋدان وتۋگە، مىندەتتى ساقتاندىرۋ راسىمدەۋگە، پايدالانۋشىنىڭ جۇرگىزۋشى كۋالىگى بولۋىنا، سونداي-اق مەملەكەتتىك تىركەۋ مەن نومىرلىك بەلگى الۋعا مىندەتتەلەدى. بۇل تالاپتار تەك جالعا بەرىلەتىن ەلەكترساموكاتتارعا قاتىستى، ال جەكە مەنشىك ساموكاتتار بۇرىنعىداي مەملەكەتتىك تىركەۋدەن وتپەيدى.
ەگەر ەلەكترساموكات جۇرگىزۋشىسى پوليتسيا قىزمەتكەرىنىڭ توقتاۋ تۋرالى زاڭدى تالابىن ورىنداماسا، اكىمشىلىك قۇقىق بۇزۋشىلىق تۋرالى كودەكستىڭ 613-بابىنا سايكەس، وعان ءۇش تاۋلىككە دەيىن اكىمشىلىك قاماۋ جازاسى قولدانىلۋى مۇمكىن.
