مەملەكەت باسشىسى قاسىم-جومارت توقاەۆ قازاقستاننىڭ جاڭا كونستيتۋتسياسىنىڭ كۇشىنە ەنۋىنە وراي حالىققا ۇندەۋ جاسادى، دەپ حابارلايدى «ادىرنا» ءتىلشىسى.
پرەزيدەنت بۇل وقيعانى ەل ءۇشىن ايرىقشا ماڭىزدى تاريحي كەزەڭ دەپ اتاپ، جاڭا كونستيتۋتسيانىڭ قابىلدانۋى قازاقستاننىڭ ساياسي جانە ەكونوميكالىق جاڭعىرۋىنا جول اشاتىنىن ايتتى.
«قۇرمەتتى وتانداستار! جاڭا كونستيتۋتسيامىزدىڭ زاڭدى كۇشىنە ەنۋى – بۇكىل ەلىمىز ءۇشىن ايرىقشا ماڭىزدى وقيعا. بارشاڭىزدى شىن جۇرەكتەن قۇتتىقتايمىن!
بۇگىن تاۋەلسىز قازاقستان تاريحىنىڭ جاڭا ءداۋىرى باستالادى. ءبىز ساياسي-ەكونوميكالىق رەفورمالاردىڭ، اۋقىمدى وزگەرىستەردىڭ جانە قارقىندى دامۋدىڭ داڭعىل جولىنا تۇسەمىز.
وسى ەرەكشە كۇن ەلىمىزدىڭ بۇكىل ساياسي جۇيەسىن، سونداي-اق مەملەكەتتىڭ جانە ازاماتتىق قوعامنىڭ نەگىزگى ينستيتۋتتارىن تۇبەگەيلى جاڭعىرتۋ كەزەڭى باستالعانىن اڭعارتادى»،–دەدى ول.
قاسىم-جومارت توقاەۆتىڭ سوزىنشە، 15 ناۋرىزدا وتكەن جالپىۇلتتىق رەفەرەندۋمدا ازاماتتار ەلدىڭ بولاشاق دامۋ باعىتىن ايقىندايتىن تاڭداۋ جاساپ، جوعارى جاۋاپكەرشىلىك پەن بىرلىك تانىتتى.
سونداي-اق پرەزيدەنت بۇدان بىلاي كونستيتۋتسيا كۇنى «ناۋرىزناما» ونكۇندىگىمەن قاتار اتالىپ وتەتىنىن مالىمدەدى. ونىڭ ايتۋىنشا، بۇل شەشىم كوكتەمگى جاڭارۋ داستۇرلەرىن اتا زاڭنىڭ نەگىزگى قۇندىلىقتارىمەن ۇشتاستىرادى.
«بۇدان بىلاي كونستيتۋتسيا كۇنى «ناۋرىزناما» ونكۇندىگىمەن قاتار اتالىپ وتەدى. مۇنىڭ سيمۆولدىق ءمانى زور. كونستيتۋتسيا كۇنى ەل ىشىندە عاسىرلار بويى ورنىققان كوكتەمگى جاڭارۋ داستۇرلەرىن اتا زاڭنىڭ باستى قاعيداتتارىمەن توعىستىرادى، ياعني ازاماتتارىمىزدىڭ ىرىستى ىنتىماققا، وزىق بىلىمگە، ەل يگىلىگى جولىندا ادال ەڭبەك ەتۋگە دەگەن تالپىنىسىمەن ۇندەسەدى.
ءبىز ناعىز حالىق كونستيتۋتسياسىنىڭ مىزعىماس قۇقىقتىق نەگىزىنە ارقا سۇيەپ، بارلىق ماقسات-مۇراتتارىمىزعا مىندەتتى تۇردە جەتەمىز. زاڭ مەن ءتارتىپ، ەڭبەكسۇيگىشتىك پەن ورلەۋ، تازالىق پەن تابيعاتتى ايالاۋ سىندى جاسامپازدىق قۇندىلىقتارىن قوعامدا بەرىك ورنىقتىرامىز. بۇعان ەش كۇمانىم جوق.
ءبىز بىرلىگى بەكەم، ءبىرتۇتاس ۇلت رەتىندە الەمدىك وركەنيەتتىڭ شىڭىن باعىندىرىپ، بارشاعا بىردەي مۇمكىندىك بەرەتىن جانە بارلىق ازاماتتىڭ جان-جاقتى دامۋىنا جول اشاتىن مەملەكەتتى – ادىلەتتى قازاقستاندى قۇرامىز. قاستەرلى وتانىمىزدى كوركەيتۋ جولىنداعى جوسپارلارىمىزدى ويداعىداي ورىندايمىز. مەن بۇعان كامىل سەنەمىن! قازاقستان رەسپۋبليكاسى جاساي بەرسىن! حالقىمىز ماڭگى جاساسىن!»– دەپ تۇيىندەدى ول.
