ۇلتتىق قاۋىپسىزدىك كوميتەتى شىعىس قازاقستان وبلىسى اكىمىنىڭ ءبىرىنشى ورىنباسارى بولعان جاقسىلىق ومارعا قاتىستى قىلمىستىق ءىستىڭ ءمان-جايىن جاريالادى، دەپ حابارلايدى «ادىرنا» ءتىلشىسى.
شەنەۋنىكتىڭ كىناسىن مويىنداعانى تۋرالى مالىمەتتەر ۆەدومستۆو تۇسىرگەن دەرەكتى فيلمدە ايتىلدى. ۇقك مالىمەتىنشە، 2025 جىلدىڭ سوڭىندا شىعىس قازاقستان وبلىسى بويىنشا ۇقك دەپارتامەنتىنىڭ قىزمەتكەرلەرى جاقسىلىق وماردىڭ قاراماعىنداعى قىزمەتكەرلەر مەن ۆەدومستۆولىق ۇيىمداردان جۇيەلى تۇردە اقشا بوپسالاعانى تۋرالى اقپارات العان. ول قاراماعىنداعىلارعا قىزمەتتىك وسۋگە ىقپال ەتەمىن دەپ ۋادە بەرگەن، ال باس تارتقان جاعدايدا جۇمىستان شىعارامىن نەمەسە لاۋازىمىن تومەندەتەمىن دەپ قورقىتقان.
2026 جىلدىڭ 4 اقپانىندا وماردىڭ قاراجات الۋ سحەماسىن قۇجاتتاۋ جانە ءتۇسىنۋ ءۇشىن قاراجاتتىڭ ءبىر بولىگى تاپسىرىلعان.
كوميتەت شەنەۋنىكتىڭ وسكەمەندەگى جەكە ۇيىندە جۇرگىزىلگەن ءتىنتۋدىڭ كادرلارىن كورسەتتى. ۆەدومستۆو مالىمەتىنشە، ءتىنتۋ بارىسىندا اقشا قاراجاتى تاركىلەنگەن. العاشقى جاۋاپ الۋ كەزىندە جاقسىلىق ومار ءوز كىناسىن مويىنداعان.
تەرگەۋ بارىسىندا قىلمىستىق كودەكستىڭ 190-بابىنىڭ 3-بولىگى بويىنشا (الاياقتىق) قوسىمشا دەرەك انىقتالعانى دا حابارلاندى. ناتيجەسىندە سوت جاقسىلىق وماردى 6 جىلعا باس بوستاندىعىنان ايىرۋ جازاسىنا كەسكەن.
ايتا كەتەيىك، جاقسىلىق ومارعا ءىرى كولەمدە الاياقتىق جاساۋ جانە ءىرى كولەمدە پارا الۋ ايىپتارى تاعىلعان بولاتىن. سوتتا ءىس بويىنشا ەكى ەپيزود قارالدى. شەنەۋنىك ءوز كىناسىن مويىنداپ، ايىپپۇل تاعايىنداۋدى سۇراعانىمەن، ءبىرىنشى ساتىداعى سوت ونى 6 جىلعا باس بوستاندىعىنان ايىردى. كەيىن ول اپەللياتسيالىق شاعىم تۇسىرگەنىمەن، ۇكىم وزگەرىسسىز قالدىرىلدى.
جاقسىلىق ومار 2025 جىلدىڭ ساۋىرىندە شىعىس قازاقستان وبلىسى اكىمىنىڭ ءبىرىنشى ورىنباسارى بولىپ تاعايىندالعان. وعان دەيىن التى جىل بويى وسكەمەن قالاسىنىڭ اكىمى قىزمەتىن اتقارعان.
