كەشە تالدىقورعان قالاسىندا ەلىمىزدىڭ جاڭا اتا زاڭىنىڭ كۇشىنە ەنۋىنە وراي «جاڭا كونستيتۋتسيا – ادىلەتتى قازاقستاننىڭ بەرىك نەگىزى» اتتى اۋقىمدى كونفەرەنتسيا ءوتتى. جيىنعا بەلگىلى قوعام قايراتكەرلەرى، عىلىم جانە ءبىلىم سالاسىنىڭ وكىلدەرى، زاڭگەرلەر، ازاماتتىق سەكتور بەلسەندىلەرى مەن جاستار قاتىسىپ، كونستيتۋتسيانىڭ ساياسي جانە قۇقىقتىق رەفورمالاردىڭ بەرىك ىرگەتاسى رەتىندەگى ماڭىزىن تالقىلادى.
ءىس-شاراعا جەتىسۋ وبلىسى اكىمىنىڭ ورىنباسارى دياس ەسداۋلەتوۆ مودەراتورلىق ەتتى. كونفەرەنتسيانى اشىپ، قاتىسۋشىلاردى ەل ومىرىندەگى ماڭىزدى مەرەكەمەن قۇتتىقتاعان ول جاڭارتىلعان كونستيتۋتسيانىڭ كۇشىنە ەنۋى ءاربىر ازامات ءۇشىن ايرىقشا مانگە يە تاريحي وقيعا ەكەنىن اتاپ ءوتتى.
دياس ەسداۋلەتوۆتىڭ ايتۋىنشا، جاڭا كونستيتۋتسيا قوعامنىڭ ادىلەتتىلىككە، اشىقتىققا جانە تەڭ مۇمكىندىكتەرگە دەگەن سۇرانىسىن ايقىن كورسەتەدى. ونىڭ نەگىزىندە زاڭنىڭ ۇستەمدىگى، ادام قۇقىقتارىن قۇرمەتتەۋ، بيلىكتىڭ جاۋاپكەرشىلىگى، ۇرپاقتار ساباقتاستىعى جانە قوعام بىرلىگى سياقتى مەملەكەت پەن حالىق ءۇشىن اسا ماڭىزدى قاعيداتتار جاتىر. ول ادىلەتتى مەملەكەت قاراپايىم ءارى تۇسىنىكتى قاعيداتتان باستالاتىنىن اتاپ ءوتتى، ياعني ءار ازامات تۇرعىلىقتى جەرىنە، ماماندىعىنا، جاسىنا نەمەسە الەۋمەتتىك جاعدايىنا قاراماستان ءوزىن زاڭنىڭ قورعاۋىندا سەزىنىپ، ءوز الەۋەتىن تولىق جۇزەگە اسىرۋعا مۇمكىندىك الۋى ءتيىس.
اتاپ وتسەك، جاڭا كونستيتۋتسيانى ازىرلەۋ جونىندەگى ۇسىنىستاردى پىسىقتاۋمەن اينالىسقان كونستيتۋتسيالىق رەفورما جونىندەگى كوميسسيانىڭ جۇمىسىنا جەتىسۋ وبلىسىنىڭ اتىنان وبلىستىق ءماسليحاتتىڭ توراعاسى گۇلنار تويلىباەۆا قاتىسقان بولاتىن. كونفەرەنتسيادا ءسوز سويلەگەن گۇلنار قوجاگەلدىقىزى قازاقستان رەسپۋبليكاسى پارلامەنتى پالاتالارىنىڭ بىرلەسكەن قورىتىندى وتىرىسىندا مەملەكەت باسشىسى زاڭ شىعارۋشى ورگاننىڭ جوعارى ميسسياسىنا ەرەكشە توقتالعانىن اتاپ ءوتتى. سونىمەن قاتار ول كونستيتۋتسيادا ادىلەتتىلىك، «زاڭ مەن ءتارتىپ»، تابيعاتقا ۇقىپتى قاراۋ سياقتى جاڭا قۇندىلىقتاردىڭ بەكىتىلگەنىنە نازار اۋداردى. بۇل مەملەكەتتىك ورگاندار شەشىم قابىلداۋ كەزىندە تەك بۇگىنگى مىندەتتەردى عانا ەمەس، قوعامنىڭ ۇزاق مەرزىمدى مۇددەلەرىن دە باسشىلىققا الۋى قاجەت ەكەنىن ايقىندايدى.
كونفەرەنتسيا قاتىسۋشىلارىنا قازاقستان رەسپۋبليكاسى پرەزيدەنتىنىڭ جانىنداعى ۇلتتىق قۇرىلتايدىڭ مۇشەسى، «جەتىسۋ وبلىسىنىڭ ازاماتتىق اليانسى» زاڭدى تۇلعالار بىرلەستىگىنىڭ توراعاسى دانيا قىدىرباەۆا بەينەۇندەۋ ارقىلى قۇتتىقتاۋ جولدادى. ول ءوز سوزىندە جاڭارتىلعان كونستيتۋتسيا ەلىمىز ءۇشىن جاڭا قۇقىقتىق كەزەڭنىڭ باستاماسى عانا ەمەس، سونىمەن قاتار ازاماتتىق قوعامدى دامىتۋعا تىڭ مۇمكىندىكتەر اشاتىنىن اتاپ ءوتتى. ونىڭ ايتۋىنشا، بۇگىنگى تاڭدا مەملەكەت پەن قوعامنىڭ ءبىر-ءبىرىن تىڭداپ، ماڭىزدى ماسەلەلەردى بىرلەسىپ تالقىلاپ، حالىقتىڭ ناقتى سۇرانىسىنا ساي كەلەتىن شەشىمدەر قابىلداۋىنىڭ ماڭىزى زور.
سونداي-اق جيىندا وبلىستىق قوعامدىق كەڭەستىڭ توراعاسى اسەت قىدىرمانوۆ، ءى. جانسۇگىروۆ اتىنداعى جەتىسۋ ۋنيۆەرسيتەتىنىڭ باسقارما توراعاسى – رەكتورى، زاڭ عىلىمدارىنىڭ دوكتورى، پروفەسسور ەرمەك بورىباەۆ، وبلىس پروكۋرورىنىڭ ورىنباسارى بىرلىك ءىزباساروۆ، قازاقستان رەسپۋبليكاسىنداعى ادام قۇقىقتارى جونىندەگى ۋاكىلدىڭ جەتىسۋ وبلىسى بويىنشا وكىلى قانات قارىمساقوۆ جانە باسقا دا سپيكەرلەر ءسوز سويلەدى.
تالقىلاۋ بارىسىندا قاتىسۋشىلار تەڭدىك، ينكليۋزيا، قۇقىقتىق مادەنيەت، قوعامدىق ديالوگ، تسيفرلىق قۇقىقتار جانە بولاشاق ۇرپاق الدىنداعى جاۋاپكەرشىلىك ت.ب. ماسەلەلەرگە توقتالدى. بۇل تاقىرىپتار جاڭا كونستيتۋتسيامەن تىكەلەي بايلانىستى، ويتكەنى قازىرگى زامانعى مەملەكەت بارشاعا – ەرەكشە قاجەتتىلىگى بار ازاماتتارعا، جاستارعا، ءتۇرلى قوعامدىق بىرلەستىكتەر وكىلدەرىنە، ءبىلىم، اقپارات جانە تسيفرلىق تەحنولوگيالار سالاسىندا جۇمىس ىستەيتىن ماماندارعا – ىڭعايلى، اشىق ءارى ادىلەتتى بولۋى ءتيىس.
وسى كۇنى ايتىلعان ويلاردىڭ جالپى مازمۇنى ءبىر ارناعا توعىستى: جاڭا كونستيتۋتسيا كۇندەلىكتى ومىردە ناقتى جۇمىس ىستەۋى ءتيىس. ول تەك زاڭگەرلەرگە، مەملەكەتتىك قىزمەتشىلەرگە نەمەسە دەپۋتاتتارعا عانا ەمەس، ءاربىر ادامعا قاتىستى. ياعني، بۇل - ءار ازاماتتىڭ ءادىل قارىم-قاتىناسقا قۇقىعى، ساپالى ءبىلىم الۋى، جەكە دەرەكتەرىنىڭ قورعالۋى، قۇقىقتىق كومەككە قولجەتىمدىلىگى، قوعام ومىرىنە قاتىسۋ مۇمكىندىگى.
كونفەرەنتسيا سوڭىندا جەتىسۋ وبلىسى اكىمىنىڭ ورىنباسارى دياس ەسداۋلەتوۆ تالقىلاۋدى قورىتىندىلاپ، جاڭا كونستيتۋتسيانىڭ كۇشىنە ەنۋى تەك قۇقىقتىق وقيعا عانا ەمەس، سونىمەن قاتار قوعامدىق جاڭعىرۋدىڭ ماڭىزدى كەزەڭى ەكەنىن اتاپ ءوتتى.
ءىس-شارا اياسىندا قاتىسۋشىلارعا جاڭا كونستيتۋتسيانىڭ ارنايى باسىلىمى تابىستالدى.
