قازاقستاننىڭ ەنەرگەتيكالىق ينفراقۇرىلىمىنداعى ستراتەگيالىق نىساندار، سونىڭ ىشىندە پاۆلودار مۇناي-حيميا زاۋىتى ەرەكشە باقىلاۋدا. بۇل تۋرالى ۇكىمەتتەگى ءباسپاسوز ءماسليحاتىندا ەنەرگەتيكا ۆيتسە-ءمينيسترى قايىرحان تۇتقىشباەۆ مالىمدەدى، دەپ حابارلايدى «ادىرنا» ءتىلشىسى.
«مۇناي وڭدەۋ زاۋىتتارى مەن جىلۋ ەلەكتر ورتالىقتارىن قوسا العاندا، ەنەرگەتيكالىق تىزبەكتەگى بارلىق نىسان ستراتەگيالىق وبەكتىلەرگە جاتادى جانە تۇراقتى كۇزەتپەن قامتاماسىز ەتىلگەن. قاۋىپسىزدىك شارالارى بۇل نىسانداردا بۇرىننان تۇراقتى نەگىزدە جۇزەگە اسىرىلىپ كەلەدى. سوڭعى وقيعالاردى ەسكەرە وتىرىپ، بۇل وبەكتىلەر، ەڭ الدىمەن، قاۋىپسىزدىكتى قامتاماسىز ەتۋ تۇرعىسىنان ەرەكشە باقىلاۋعا الىندى»، — دەدى ۆيتسە-مينيستر.
سونداي-اق ول رەسەيدەگى مۇناي وڭدەۋ زاۋىتتارىنا جاسالعان سوققىلاردىڭ قازاقستانعا مۇناي ونىمدەرىن جەتكىزۋگە ىقتيمال اسەرى تۋرالى پىكىر ءبىلدىردى. ونىڭ ايتۋىنشا، رەسەيدەن نەگىزىنەن ديزەل وتىنى مەن اۆياتسيالىق وتىن ساتىپ الىنعان.
«قازىرگى تاڭدا قاجەتتى بالانس قالىپتاستىرىلعان. سونىمەن قاتار مۇناي ونىمدەرىن جەتكىزۋدىڭ بالاما باعىتتارى بويىنشا جۇمىستى جالعاستىرىپ جاتىرمىز»، — دەدى تۇتقىشباەۆ.
بۇعان دەيىن ەنەرگەتيكا مينيسترلىگى ومبى مۇناي وڭدەۋ زاۋىتىنا جاسالعان شابۋىلداردىڭ قازاقستاننىڭ بەنزينمەن قامتىلۋىنا اسەر ەتپەيتىنىن حابارلاعان بولاتىن. ۆەدومستۆو مالىمەتىنشە، وتاندىق مۇناي وڭدەۋ زاۋىتتارى شتاتتىق رەجيمدە جۇمىسىن جالعاستىرىپ جاتىر. سونىمەن قاتار جانارمايدىڭ شەكارا ارقىلى سىرتقا شىعارىلۋىنا جول بەرمەۋ ءۇشىن قوسىمشا شەكتەۋلەر ەنگىزىلگەن.
