قىتايدىڭ وڭتۇستىك جاعالاۋىنا سوققان قۋاتتى «مايساك» تايفۋنى سالدارىنان كەمىندە 38 ادام قازا تاپتى، دەپ حابارلايدى "ادىرنا" ءتىلشىسى.
سينحۋا دەرەگىنشە، اپات بوگەتتىڭ بۇزىلۋىنا، كوشكىندەردىڭ جۇرۋىنە جانە كەڭ اۋقىمدى سۋ تاسقىنىنا سەبەپ بولدى.
ەڭ كوپ زارداپ شەككەن ايماقتار – ەلدىڭ وڭتۇستىگىندەگى گۋانسي-چجۋان اۆتونوميالىق اۋدانى مەن ورتالىقتاعى حۋبەي پروۆينتسياسى. نوسەر جاۋىن، بوگەتتەردىڭ جارىلۋى جانە قاتتى جەل سالدارىنان ونداعان مىڭ تۇرعىن قاۋىپسىز جەرگە كوشىرىلدى.
قۇتقارۋ جۇمىستارىنا اسكەري قىزمەتكەرلەر، ۇشقىشسىز ۇشۋ اپپاراتتارى جانە 5700 قايىق جۇمىلدىرىلدى. تابيعي اپات ايماعىنان شامامەن 130 مىڭ ادام ەۆاكۋاتسيالاندى. ولاردىڭ قاتارىندا گۋيگان قالاسىندا سۋ قۇرساۋىندا قالعان 10 مىڭنان استام ستۋدەنت پەن وقىتۋشى دا بار.
بۇدان بولەك، حايۋاناتتار باعى مەن ۋلى جىلان وسىرىلەتىن فەرماداعى ونداعان جانۋار قاشىپ كەتكەنى حابارلاندى.
