اقش اسكەري كۇشتەرى يرانداعى بىرقاتار اسكەري نىسانعا تاعى دا اۋە سوققىلارىن جاساعانىن مالىمدەدى. امەريكالىق تاراپ بۇل ارەكەتتى ورمۋز بۇعازى ارقىلى ءوتىپ بارا جاتقان كوممەرتسيالىق كەمەگە جاسالعان شابۋىلعا جاۋاپ رەتىندە ءتۇسىندىردى. بۇل تۋرالى ۆۆس جازدى، دەپ حابارلايدى “ادىرنا”.
اقش ورتالىق قولباسشىلىعىنىڭ (Centcom) مالىمەتىنشە، كيپر تۋى استىندا جۇزگەن كەمە يراننىڭ يسلام رەۆوليۋتسياسى ساقشىلار كورپۋسىنىڭ (كسير) شابۋىلىنا ۇشىراعان. پەنتاگوننىڭ حابارلاۋىنشا، كەمە قوزعالتقىشى زاقىمدانىپ، ءجۇزۋىن جالعاستىرا الماعان. ەكيپاج مۇشەلەرىنىڭ ءبىرى ءىز-ءتۇزسىز جوعالعان.
ءوز كەزەگىندە يران تاراپى كەمە ترانسپوندەرىن ءوشىرىپ، تەڭىز قاتىناسىنا قاۋىپ توندىرگەنىن العا تارتتى. كسير مالىمدەۋىنشە، كەمە ەسكەرتۋ رەتىندە وق اتىلعاننان كەيىن توقتاتىلعان.
وقيعادان كەيىن كسير ورمۋز بۇعازىن ارنايى حابارلاماعا دەيىن جاباتىنىن جاريالاپ، اقش ايماقتاعى ارالاسۋىن توقتاتپايىنشا بۇل شەشىم وزگەرمەيتىنىن مالىمدەدى. سونىمەن قاتار يران اقش-تىڭ اسكەري ارەكەتتەرىنە قاتاڭ جاۋاپ بەرەتىنىن ەسكەرتتى.
اقش سوققىلارىنان كەيىن يران ايماقتاعى امەريكالىق وداقتاستارعا باعىتتالعان شابۋىلدارىن قايتا باستادى. يران اسكەرى كاتار، كۋۆەيت، يوردانيا جانە باحرەيندەگى اقش اسكەري بازالارىنا سوققى جاساعانىن حابارلادى. سونىمەن بىرگە ومان پورتىنداعى امەريكالىق كۇشتەر پايدالانعان نىساندارعا دا شابۋىل جاسالعانى ايتىلدى.
Centcom مالىمەتىنشە، اقش-تىڭ سوڭعى وپەراتسياسى بارىسىندا يرانداعى شامامەن 140 اسكەري نىساناعا سوققى جاسالعان. ولاردىڭ قاتارىندا زىمىران جانە ۇشقىشسىز ۇشۋ اپپاراتتارى باعدارلاماسىنا قاتىستى وبەكتىلەر، اسكەري-تەڭىز ينفراقۇرىلىمى، وق-ءدارى قويمالارى، بايلانىس جۇيەلەرى مەن جاعالاۋداعى باقىلاۋ بەكەتتەرى بار.
يران بيلىگىنىڭ مالىمەتىنشە، وسى اپتادا جاسالعان اقش سوققىلارى سالدارىنان 17 ادام قازا تاۋىپ، 115 ادام جارالانعان.
اقش پرەزيدەنتى دونالد ترامپ ۆاشينگتون مەن تەگەران اراسىنداعى ءبىتىمنىڭ كۇشىن جويعانىن مالىمدەدى. ال يراننىڭ سىرتقى ىستەر ءمينيسترى ابباس اراگچي اقش-تى كەلىسىم تالاپتارىن بۇزدى دەپ ايىپتادى. سوعان قاراماستان امەريكالىق تاراپ يرانمەن كەلىسسوزدەردى جالعاستىرۋ مۇمكىندىگىن جوققا شىعارعان جوق.
سونىمەن قاتار يراننىڭ جاڭادان تاعايىندالعان جوعارعى كوشباسشىسى مودجتابا حامەنەي العاشقى ۇندەۋىندە اكەسى ءالي حامەنەيدىڭ ءولىمى ءۇشىن كەك الۋعا ۋادە بەردى.
