«قازاتومونەركاسىپ» ۇلتتىق اتوم كومپانياسى رەسەي جانە قىتايداعى سەرىكتەستەرىنە تابيعي ۋران جەتكىزۋ جونىندە كەلىسىمدەرگە قول جەتكىزدى. بۇل تۋرالى بۇگىن، 21 تامىزدا كومپانيانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
اتاپ ايتقاندا، «قازاتومونەركاسىپ» «روساتومنىڭ» قۇرامىنداعى «ۋرانيۋم ۋان گرۋپ» كومپانياسىمەن ءسىبىر حيميا كومبيناتىنىڭ وندىرىستىك قۋاتتارىنا شيكىزات جەتكىزۋ ماسەلەسىن كەلىسكەن. كەلىسىمشارت جوباسى ازىرلەنىپ، تاراپتارمەن ماقۇلدانعان.
ودان بولەك، كومپانيا قىتايدىڭ State Nuclear Uranium Resource Development Company Limited (SNURDC) ۇيىمىمەن ەكسپورتتىق كەلىسىمگە قول قويعان. جۇكتى قابىلداۋ پۋنكتى رەتىندە الاشانكوۋ تەمىرجول ستانتسياسى بەلگىلەنگەن.
كوممەرتسيالىق قۇپيا تالاپتارىنا بايلانىستى جەتكىزىلىم كولەمى، قۇنى جانە كەستەسى جاريالانعان جوق.
كەلىسىمدەرگە قاتىستى قۇجاتتار «قازاتومونەركاسىپ» اكتسيونەرلەرىنىڭ جالپى جينالىسىنىڭ قاراۋىنا ۇسىنىلعان.
