توپ بايقاۋشىلارى سايلاۋ كۇنى قازاقستاننىڭ 11 قالاسىنداعى مىڭنان استام سايلاۋ ۋچاسكەسىندە داۋىس بەرۋ پروتسەسىنە مونيتورينگ جۇرگىزگەن. باقىلاۋدىڭ مۇنداي كەڭ اۋقىمدى دەڭگەيى ەلىمىزدىڭ ءارتۇرلى وڭىرلەرىندەگى سايلاۋ بارىسىنا جان-جاقتى ءارى وبەكتيۆتى باعا بەرۋگە مۇمكىندىك بەردى دەيدى «حالىق ءۇنى» وكىلدەرى.
قوزعالىستىڭ نەگىزگى شتابى الماتى قالاسىندا ورنالاسقان. سونىمەن قاتار، «حالىق ءۇنى» قوزعالىسىنىڭ قولداۋشىلارى مەن باقىلاۋشىلار جەلىسى ەلىمىزدىڭ بىرقاتار ءوڭىرىن قامتىدى. باقىلاۋ جۇمىستارى الماتى، استانا، شىمكەنت، تۇركىستان، قىزىلوردا، اقتوبە، ورال، سەمەي، تاراز، قوناەۆ جانە تالدىقورعان قالالارىندا جۇرگىزىلدى.
باقىلاۋ ميسسياسىنا دايىندىق بارىسىندا 11 قالادا مىڭنان استام ازامات ەلەكتورالدىق باقىلاۋ ادىستەرى بويىنشا ارنايى وقىتۋدان ءوتتى. باقىلاۋشىلاردى قوعامدىق-ساياسي پروتسەستەر سالاسىنداعى تاجىريبەلى ساراپشىلار — ساياساتتانۋشى دوس كوشىم، ساراپشى جانە باسپاگەر باقىتجان بۇقارباي، جۋرناليست ەرمۇرات باپي جانە قوعام قايراتكەرى بەكنۇر كيسيكوۆ دايارلادى. ساياسي كەڭەس بەرۋ بويىنشا ساراپشى نۇرگەلدى ابدىعاني مەن ساياساتتانۋشى نۇربولات نىشانباي قاتىسقان.
وقىتۋ باعدارلاماسىنىڭ قورىتىندىسى بويىنشا دايىندىقتان وتكەن ازاماتتاردىڭ اراسىنان باقىلاۋشىلار ىرىكتەلىپ، ولارعا سايلاۋ ۋچاسكەلەرىندە باقىلاۋ جۇرگىزۋگە ارنالعان رەسمي جولدامالار بەرىلگەن.
«حالىق ءۇنى» قوزعالىسى بايقاۋشىلارى داۋىس بەرۋ كۇنى ۋچاسكەلەردە تاڭەرتەڭنەن باستاپ بارلىق سايلاۋ راسىمدەرى اياقتالعانعا دەيىن جۇمىس ىستەپ، ازاماتتىق باقىلاۋدى بارىنشا ساپالى جانە جان-جاقتى جۇرگىزۋگە كۇش سالدى.
توپ مۇشەلەرى ۋچاسكەلەردە داۋىس بەرۋدىڭ نەگىزگى راسىمدەرى قولدانىستاعى زاڭناما تالاپتارىنا تولىق سايكەس ءوتتى دەيدى. سسايلاۋشىلاردىڭ بەلسەندىلىگى جوعارى بولعانىن اتاپ ءوتتى. «حالىق ءۇنى» سايلاۋ پروتسەسىنىڭ بارىنشا شىنايى، ءادىل وتكەنىن ايتتى.
باقىلاۋ بارىسىندا كەزدەسكەن كىشىگىرىم زاڭ بۇزۋشىلىقتار بويىنشا باقىلاۋشىلار ءتيىستى اكتىلەر مەن حاتتامالاردى راسىمدەگەن. قازىرگى ۋاقىتتا الىنعان اقپاراتتى جيناقتاۋ، جۇيەلەۋ جانە قوسىمشا تەكسەرۋ جۇمىستارى جالعاسۋدا دەيدى. جاقىن ۋاقىتتا بارلىق ماتەريالدار قورىتىندىلانىپ، ساراپتاما جاسالىنباق. «حالىق ءۇنى» بايقاۋشىلارى باقىلاۋ جۇمىستارى مەن ازىرلەنەتىن ۇسىنىستار سايلاۋ پروتسەسىن ودان ءارى جەتىلدىرۋگە، ازاماتتاردىڭ سايلاۋ ينستيتۋتتارىنا دەگەن سەنىمىن نىعايتۋعا ىقپال ەتەدى دەگەن سەنىم ءبىلدىردى.
