پرەمەر-مينيستر ولجاس بەكتەنوۆ «قازاۆتوجول» باسقارما توراعاسى دارحان يماناشەۆتىڭ جول قاۋىپسىزدىگى بويىنشا ەسەبىن تىڭداپ، جولداردىڭ ساپاسىنا قاتىستى بىرقاتار ماسەلەنى كوتەردى، دەپ حابارلايدى "ادىرنا".
ۇكىمەت وتىرىسىندا دارحان يماناشەۆ جىل باسىنان بەرى رەسپۋبليكالىق ماڭىزى بار جولداردا 2062 جول-كولىك وقيعاسى تىركەلگەنىن ايتتى. ونىڭ سوزىنشە، بۇل وتكەن جىلدىڭ سايكەس كەزەڭىمەن سالىستىرعاندا 10%-عا از.
سونىمەن قاتار رەسپۋبليكالىق ماڭىزى بار جولدارداعى كولىك قوزعالىسىنىڭ قارقىندىلىعى 30%-عا ارتقان. وسىعان بايلانىستى جولداردىڭ ءبىرىنشى جانە ەكىنشى ساناتتارىنىڭ ۇزىندىعى ۇلعايىپ، بەينەمونيتورينگ جۇيەلەرى مەن جولداردىڭ ينجەنەرلىك جابدىقتارى جەتىلدىرىلىپ جاتىر.
ۇكىمەت مالىمەتىنشە، رەسپۋبليكالىق ماڭىزى بار جولداردىڭ 94%-ى نورماتيۆتىك تالاپتارعا سايكەس كەلەدى. ال وبلىستىق جانە اۋداندىق ماڭىزى بار جولدار بويىنشا بۇل كورسەتكىش 91%-دى قۇرايدى.
پرەمەر-مينيستر ولجاس بەكتەنوۆ جول ساپاسىنا قاتىستى ماسەلەلەر بۇعان دەيىن دە كوتەرىلگەنىن اتاپ ءوتتى.
«پرەزيدەنت اتاپ وتكەن بارلىق كەمشىلىك سىزدەردىڭ جۇمىستارىڭىزعا دا تىكەلەي قاتىستى. سوندىقتان جول ساپاسىن جاقسارتۋ قاجەت. جۇمىس ىستەڭىزدەر، ايتپەسە بۇل ماسەلە بويىنشا باسقا ادامدار جۇمىس ىستەيدى»، – دەدى پرەمەر-مينيستر.
ۇكىمەت باسشىسى جول قۇرىلىسى مەن جوندەۋ جۇمىستارىنىڭ ساپاسىن ارتتىرۋدى جانە انىقتالعان كەمشىلىكتەردى جويۋدى تاپسىردى.
