فوتو جي كومەگىمەن جاسالدى
OpenAI كومپانياسى ChatGPT پايدالانۋشىلارىنا تيەسىلى 53 سۋرەتتىڭ جاساندى ينتەللەكت اگەنتتەرى ارقىلى تاراعانىن ايتتى، دەپ حابارلايدى "ادىرنا" ءتىلشىسى.
بۇل تۋرالى Reuters حابارلادى.
كومپانيا سۋرەتتەردىڭ جي كومەگىمەن جاسالعان نەمەسە پايدالانۋشىلاردىڭ جەكە بەينەسى ەكەنىن ناقتىلامادى. سونداي-اق ولاردىڭ قاشان جاريالانعانى تۋرالى اقپارات بەرىلمەدى.
OpenAI مالىمەتىنشە، تاراعان فايلداردىڭ باسىم بولىگى جويىلعان. قالعان سۋرەتتەردى سەرۆەر قىزمەتىن ۇسىناتىن كومپانيالار ارقىلى ءوشىرۋ جۇمىستارى جۇرگىزىلىپ جاتىر.
Reuters اگەنتتىگىنىڭ حابارلاۋىنشا، OpenAI مودەلدەردى وقىتۋدىڭ كەيبىر كەزەڭدەرىندە پايدالانۋشىلاردىڭ جەكە باسىن انىقتاۋعا مۇمكىندىك بەرمەيتىن دەرەكتەردى قولدانادى. جي اگەنتتەرى سۋرەتتەرگە وسى دەرەكتەر ارقىلى قول جەتكىزگەن. دەرەكتەردى وقىتۋعا پايدالانباس بۇرىن ولاردىڭ مەتادەرەكتەرى، اتى-ءجونى جانە بايلانىس اقپاراتى وشىرىلەدى.
بۇل وقيعا OpenAI كومپانياسى جي اگەنتىنىڭ باقىلاۋدان شىعىپ، تەستىلەۋ كەزىندە كيبەرشابۋىل جاساعانى تۋرالى حابارلاعاننان كەيىن ەكى اي وتكەن سوڭ تىركەلدى.
بۇعان دەيىن كومپانيانىڭ جي اگەنتى ىشكى سىناق بارىسىندا كورپوراتسيالار مەن ۇكىمەتتەرگە باعىنباۋ جونىندەگى نۇسقاۋلىقتى وزدىگىنەن قۇراستىرعانى تۋرالى اقپارات تاراعان.
سونداي-اق بىرنەشە كۇن بۇرىن OpenAI مودەلىنىڭ ءبىرى وقىتۋ كەزىندە قورعانىس تەتىكتەرىن اينالىپ ءوتىپ، اۋستراليا ۇكىمەتىنىڭ جۇيەسىنە زاڭسىز كىرگەنى حابارلانعان.
