وزبەكستان پرەزيدەنتى شاۆكات ميرزيوەۆ ۇكىمەت قۇرىلىمىندا جاڭا لاۋازىم ەنگىزدى، دەپ حابارلايدى "ادىرنا" ءتىلشىسى.
فەرعانا دەرەگىنشە، پرەمەر-ءمينيستردىڭ ءبىرىنشى ورىنباسارى – ءبىلىم جانە عىلىم ءمينيسترى قىزمەتىنە ەركينجون تۋرديموۆ تاعايىندالدى. بۇل تۋرالى مەملەكەت باسشىسىنىڭ ءباسپاسوز قىزمەتى حابارلادى.
بۇعان دەيىن ول سىرداريا وبلىسىنىڭ اكىمى قىزمەتىن اتقارعان.
سونىمەن قاتار ءبىلىم، عىلىم جانە دەنساۋلىق ساقتاۋ ماسەلەلەرى جونىندەگى حاتشىلىق قۇرىلدى. جاڭا ۆيتسە-پرەمەرگە رەسپۋبليكالىق مينيسترلىكتەردىڭ، كوميتەتتەر مەن اگەنتتىكتەردىڭ جۇمىسىن ۇيلەستىرۋ، سونداي-اق وبلىستار مەن تاشكەنت قالاسى اكىمدەرىنىڭ قىزمەتىن قاداعالاۋ مىندەتى جۇكتەلدى. بۇل باعىتتاعى جۇمىستاردىڭ ورىندالۋىن پرەزيدەنت اكىمشىلىگىنىڭ باسشىسى سايدا ميرزيوەۆا باقىلايدى.
ەركينجون تۋرديموۆ 1969 جىلعى 10 شىلدەدە سامارقاند وبلىسىندا دۇنيەگە كەلگەن. 1991 جىلى تاشكەنت حالىق شارۋاشىلىعى ينستيتۋتىن ەكونوميست ماماندىعى بويىنشا بىتىرگەن. ءار جىلدارى ناۋاي، سۇرحانداريا، سامارقاند جانە سىرداريا وبلىستارىن باسقارعان.
ايتا كەتەيىك، وزبەكستاندا ءبىلىم جانە عىلىم مينيسترلىگى 2026 جىلعى 3 قازاندا مەكتەپكە دەيىنگى جانە مەكتەپتىك ءبىلىم بەرۋ، سونداي-اق جوعارى ءبىلىم، عىلىم جانە يننوۆاتسيالار مينيسترلىكتەرىن بىرىكتىرۋ ارقىلى قۇرىلعان.
