اقش، قىتاي جانە بريتانيا قازاقستان مۇنايىن بارلاۋعا قارجى سالۋى مۇمكىن

قازاقستاندا جاڭا مۇناي كەن ورىندارىن بارلاۋ ءۇشىن ءبىر توپ شەتەلدىك كومپانيا 500 ملن دوللار سالماق، دەپ حابارلايدى “ادىرنا” ءتىلشىسى.

اتاپ ايتقاندا، امەريكالىق Chevron, بريتاندىق Shell جانە قىتايلىق Sinopec پەن China National Offshore Oil Corporation كومپانيالارىنىڭ قاتىسۋىمەن كونسورتسيۋم قۇرۋ جوسپارلانىپ وتىر. بىرلەسكەن كاسىپورىنعا شامامەن 500 ملن دوللار ينۆەستيتسيا سالۋ كوزدەلگەن.

«قازمۇنايگاز» ۇلتتىق كومپانياسى باسقارما توراعاسىنىڭ ءبىرىنشى ورىنباسارى قۇرمانعازى ەسقازيەۆتىڭ ايتۋىنشا، تاراپتار سەيسميكالىق بارلاۋ جۇمىستارىن جۇرگىزىپ، كەيىن ىزدەۋ ۇڭعىمالارىن بۇرعىلاۋ مۇمكىندىگىن قاراستىرىپ جاتىر. سونىمەن قاتار مينيسترلىكتەرمەن 23 جوبا بويىنشا كەلىسسوزدەر جۇرگىزىلۋدە.

جاڭا كونسورتسيۋم اياسىندا تەرەڭدىگى 5,5–10 شاقىرىم بولاتىن ۇڭعىمالاردى بۇرعىلاۋ جوسپارلانعان. قازىرگى ءىرى مۇناي كەن ورىندارىنداعى ۇڭعىمالاردىڭ ەڭ ۇلكەن تەرەڭدىگى شامامەن 5,5 شاقىرىمعا جەتەدى.

باسىلىمنىڭ مالىمەتىنشە، كونسورتسيۋمدى 2026 جىلدىڭ سوڭىنا دەيىن قۇرۋ جوسپارلانىپ وتىر.

اتالعان كومپانيالاردىڭ بارلىعى قازاقستاندا جۇمىس ىستەيدى جانە ەلىمىزدەگى ءىرى مۇناي كەن ورىندارىن يگەرۋگە باعىتتالعان باسقا دا كونسورتسيۋمداردىڭ قۇرامىنا كىرەدى.

قازاقستاندا كومىرسۋتەك شيكىزاتىنىڭ 350-دەن استام كەن ورنى بار. قازىر مۇناي ءوندىرۋ كولەمى شەگىنە جەتكەن نەمەسە تومەندەي باستاعان كەن ورىندارىنىڭ ۇلەسى باسىم. وسىعان بايلانىستى ەل بيلىگى مۇناي ءوندىرۋ كولەمىن ساقتاۋ جانە ارتتىرۋ ماقساتىندا گەولوگيالىق بارلاۋ جۇمىستارىن كەڭەيتۋدى كوزدەپ وتىر.