بۇگىن، 15 قازاندا باكۋدە ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) VII ءسامميتى باستالادى. بۇل كۇن يلحام اليەۆتىڭ ازەربايجان پرەزيدەنتى بولىپ العاش سايلانعان كۇنىنە تۋرا كەلىپ وتىر، دەپ حابارلايدى «ادىرنا» ءتىلشىسى.
سامميت ازەربايجاننىڭ توراعالىعىمەن، اوسشك حاتشىلىعىنىڭ قولداۋىمەن وتەدى. جيىنعا مەملەكەتتەر مەن ۇكىمەتتەر باسشىلارى، ۇيىمعا مۇشە ەلدەردىڭ، باقىلاۋشى مەملەكەتتەردىڭ دەلەگاتسيالارى جانە حالىقارالىق ۇيىمداردىڭ وكىلدەرى قاتىسادى.
كەزدەسۋدىڭ نەگىزگى تاقىرىپتارى — وڭىرلىك قاۋىپسىزدىكتى نىعايتۋ، ازيا ەلدەرى اراسىنداعى ىنتىماقتاستىقتى دامىتۋ، قازىرگى زامانعى سىن-قاتەرلەر مەن قاۋىپتەرگە قارسى ءىس-قيمىل.
بۇدان بولەك، كوشباسشىلار حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا پىكىر الماسادى.
سامميت قورىتىندىسىندا لاوستىڭ اوسشك-گە تولىققاندى مۇشە رەتىندە قوسىلۋى تۋرالى شەشىم قابىلدانۋى مۇمكىن.
بۇعان دەيىن 14 قازاندا ازەربايجان پرەزيدەنتىنىڭ اتىنان سامميت قاتىسۋشىلارىنىڭ قۇرمەتىنە ارناپ رەسمي كەشكى اس بەرىلگەن ەدى. Report اگەنتتىگىنىڭ حابارلاۋىنشا، ءىس-شاراعا پرەزيدەنت يلحام اليەۆ، ءبىرىنشى حانىم مەحريبان اليەۆا جانە ولاردىڭ قىزى ارزۋ اليەۆا قاتىسقان.
ايتا كەتەيىك، 2003 جىلعى 15 قازاندا يلحام اليەۆ ازەربايجان پرەزيدەنتى بولىپ سايلانعان بولاتىن. پرەزيدەنت سايلاۋىندا سايلاۋشىلاردىڭ 76 پايىزدان استامى يلحام اليەۆكە داۋىس بەرگەن.
