eGov Mobile ءموبيلدى قوسىمشاسىندا وتباسىنىڭ الەۋمەتتىك جانە ماتەريالدىق جاعدايىن باعالاۋعا مۇمكىندىك بەرەتىن جاڭا سەرۆيس قولجەتىمدى بولدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى جاريالادى، دەپ حابارلايدى “ادىرنا”.
مينيسترلىكتىڭ مالىمەتىنشە، سەرۆيس 2027 جىلعى 1 قاڭتاردان باستاپ مەملەكەتتىك كومەكتىڭ كەيبىر تۇرلەرىن وتباسىنىڭ ناقتى جاعدايى مەن قاجەتتىلىكتەرىنە قاراي تاعايىنداۋ جۇيەسىنە كوشۋ اياسىندا ەنگىزىلگەن.
جاڭا كالكۋلياتور ازاماتتارعا وتباسىنىڭ ءال-اۋقات دەڭگەيىن الدىن الا انىقتاپ، باعالاۋ تالاپتارىمەن تانىسۋعا مۇمكىندىك بەرەدى. ەسەپتەۋ كەزىندە وتباسىنىڭ تابىسى مەن مۇلكىنەن بولەك، ونىڭ قۇرامى، بالالاردىڭ، قارت ادامداردىڭ جانە مۇگەدەكتىگى بار ازاماتتاردىڭ بولۋى سياقتى الەۋمەتتىك فاكتورلار دا ەسكەرىلەدى.
وتباسىنىڭ جاعدايىن باعالاۋ التى باعىت بويىنشا جۇرگىزىلىپ، 59-دان استام كورسەتكىشتى قامتيدى.
ۆەدومستۆو اتاپ وتكەندەي، كالكۋلياتور ناتيجەسى پايدالانۋشىنىڭ ءوزى ەنگىزگەن اقپارات نەگىزىندە قالىپتاسادى جانە تەك انىقتامالىق سيپاتقا يە. سوندىقتان ونىڭ قورىتىندىسى الەۋمەتتىك تولەمدى تاعايىنداۋ نەمەسە توقتاتۋ تۋرالى رەسمي شەشىم بولىپ ەسەپتەلمەيدى.
ايتا كەتەيىك، 2027 جىلدىڭ 1 قاڭتارىنان باستاپ قازاقستاندا الەۋمەتتىك جاردەماقىلاردى تاعايىنداۋ تارتىبىنە وزگەرىستەر ەنگىزىلەدى. بۇعان دەيىن بالانىڭ تۋى، كوپبالالى وتباسى مارتەبەسى جانە باسقا دا الەۋمەتتىك نەگىزدەر بويىنشا بەرىلىپ كەلگەن تولەمدەر ەندى وتباسىنىڭ ماتەريالدىق جاعدايى مەن ناقتى مۇقتاجدىعىن ەسكەرە وتىرىپ تاعايىندالاتىن بولادى.
جاڭا ءتارتىپ الەۋمەتتىك تولەمدەردىڭ 14 تۇرىنە قاتىستى. سونىمەن قاتار قازاقستانداعى وتباسىلاردىڭ ءال-اۋقاتى بەس سانات بويىنشا باعالانادى.
