اقمولا وبلىسىنىڭ زەرەندى اۋدانىنا قاراستى ايدارلى اۋىلىندا ءماسىپ باتىرحانۇلى اتىنداعى حالىقارالىق «قانسونار-2026» قۇسبەگىلىك ءتۋرنيرى جالعاسۋدا. بۇگىن جارىستىڭ بۇركىتتەر اراسىنداعى ەكى كەزەڭى ءوتىپ، قاتىسۋشىلار قىران باپتاۋداعى شەبەرلىكتەرىن كورسەتتى. ءتۋرنيردىڭ قورىتىندى ناتيجەلەرى ەرتەڭ جاريالانادى.
حالىقارالىق دوداعا قازاقستاننىڭ توعىز وڭىرىنەن، سونداي-اق تۇركيا، موڭعوليا جانە رەسەيدەن كەلگەن قۇسبەگىلەر قاتىسۋدا. ۇيىمداستىرۋشىلاردىڭ مالىمەتىنشە، جارىسقا 50 قاتىسۋشى تىركەلگەن. سايىسقا 49 بۇركىت، 15 يتەلگى جانە 10 قارشىعا اكەلىنگەن. بۇگىن بۇركىتتەر اراسىنداعى «قولعا شاقىرۋ» جانە «تۇلكىگە سالۋ» كەزەڭدەرى ءوتتى. ەرتەڭ يتەلگى مەن قارشىعا باعىتتارى بويىنشا جارىستار ۇيىمداستىرىلادى.
حالىقارالىق دارەجەدەگى تورەشى مارات قويشيننىڭ ايتۋىنشا، بيىلعى تۋرنيرگە تاجىريبەلى قۇسبەگىلەرمەن قاتار، ازيا جانە الەم چەمپيوندارى، سونداي-اق دۇنيەجۇزىلىك كوشپەندىلەر ويىندارىنىڭ چەمپيوندارى مەن جۇلدەگەرلەرى قاتىسىپ جاتىر. ونىڭ سوزىنشە، جارىستىڭ حالىقارالىق اۋقىمى ۇلتتىق قۇسبەگىلىك ونەرگە دەگەن قىزىعۋشىلىقتىڭ ارتىپ كەلە جاتقانىن كورسەتەدى.
تۋرنيرگە قاتىسۋشىلاردىڭ قاتارىندا الماتى قالاسىنان كەلگەن ارمان قۇشقاروۆ تا بار. ول قۇسبەگىلىك ونەردى بالا كەزىنەن اكەسىنە قاراپ ۇيرەنگەن. قازىر جارىسقا مەدەۋ اتتى بۇركىتىمەن قاتىسىپ وتىر. بۇل قىران دۇنيەجۇزىلىك كوشپەندىلەر ويىندارىندا قازاقستان اتىنان ونەر كورسەتىپ، كۇمىس جۇلدەگە يە بولعان.
«قۇسبەگى ءۇشىن ەڭ ماڭىزدىسى – قىراننىڭ مىنەزىن ءتۇسىنۋ. ءار بۇركىتتىڭ وزىندىك ەرەكشەلىگى بار، سوندىقتان ولاردىڭ بارىنە بىردەي ءتاسىل قولدانۋعا بولمايدى. قۇستىڭ مىنەزىنە قاراي باپتاۋ ادىستەرىن دە وزگەرتۋ قاجەت»، – دەيدى ارمان قۇشقاروۆ.
ۇلتتىق ونەردىڭ ۇرپاقتان ۇرپاققا جالعاسىپ كەلە جاتقانىن موڭعوليانىڭ بايان-ولگەي ايماعىنان كەلگەن قۇسبەگى نۇرعايىپ ىدىرىسۇلىنىڭ تاريحى دا دالەلدەيدى. ول قۇسبەگىلىكپەن 46 جىلدان بەرى اينالىسادى جانە «قانسونار» تۋرنيرىنە ءتورتىنشى رەت قاتىسىپ وتىر. ايتۋىنشا، ونىڭ جەتى اتاسى دا بۇركىتشى بولعان. سونداي-اق ول قۇسبەگىلىك ونەرىمەن تانىلعان قىز ايشولپاننىڭ اكەسى.
نۇرعايىپ ىدىرىسۇلى موڭعوليادا ۇيادان العان ەكى جاسار بۇركىتىن الىپ كەلگەن. ول قازاقستان حالقىنا سالەم جولداپ، بارلىق قۇسبەگىگە ساتتىلىك تىلەدى.
ءتۋرنيردىڭ تاعى ءبىر قاتىسۋشىسى – تۇركيادان كەلگەن مۋتلۋ. ول قازاقستانعا التىنشى رەت كەلىپ وتىر جانە جارىسقا يتەلگىمەن قاتىسادى. قۇسبەگىنىڭ ايتۋىنشا، بۇل ساپاردىڭ ماڭىزى تەك جارىسپەن شەكتەلمەيدى.
«مەن قازاقستاندى وتە جاقسى كورەمىن. قازاق دوستارىممەن بىرگە بولۋ مەن ءۇشىن جارىسقا قاتىسۋدان دا ماڭىزدى»، – دەيدى مۋتلۋ.
ول قۇسبەگىلىك ونەردى تۇركى حالىقتارىنا ورتاق كونە ءداستۇر رەتىندە اتاپ ءوتتى. ونىڭ پىكىرىنشە، ساياتشىلىق ونەرى قازاقتار مەن قىرعىزدار اراسىندا عانا ەمەس، تۇركياداعى تۇركى قاۋىمداستىقتارى اراسىندا دا ساقتالعان مادەني مۇرانىڭ ءبىر بولىگى.
حالىقارالىق «قانسونار-2026» ءتۋرنيرى ۇلتتىق قۇندىلىقتاردى ساقتاۋ، ءداستۇرلى ساياتشىلىق ونەرىن دامىتۋ جانە ونى جاس ۇرپاققا تانىتۋ ماقساتىندا ۇيىمداستىرىلعان. جارىس 22 قازانعا دەيىن جالعاسادى. ەرتەڭ ءتۋرنيردىڭ كەلەسى كەزەڭدەرى ءوتىپ، قورىتىندى ناتيجەلەرى جاريالانادى.
