2022 جىلعى 26 تامىزدا نۇرلان ءابدىروۆتىڭ توراعالىق ەتۋىمەن 2022 جىلعى 24 تامىزدا وتكەن اباي، جەتىسۋ جانە ۇلىتاۋ وبلىستارىنان قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋ قورىتىندىلارىن انىقتاۋ جانە جاريالاۋ ماسەلەسى بويىنشا قازاقستان رەسپۋبليكاسى ورتالىق سايلاۋ كوميسسياسىنىڭ وتىرىسى ءوتتى.
وتىرىسقا بەينەكونفەرەنتسيا بايلانىسى رەجيمىندە اباي، جەتىسۋ جانە ۇلىتاۋ وبلىستارىنىڭ اۋماقتىق سايلاۋ كوميسسيالارىنىڭ توراعالارى قاتىستى.
نۇرلان ءابدىروۆ وتىرىستى اشا وتىرىپ، جاڭادان قۇرىلعان اباي، جەتىسۋ جانە ۇلىتاۋ وبلىستارىنان قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋ العاش رەت وتكىزىلگەنىن اتاپ ءوتتى.
مەملەكەت باسشىسى قاسىم-جومارت توقاەۆتىڭ ءۇش جاڭا وبلىس قۇرۋ تۋرالى جارلىعى كۇشىنە ەنگەننەن كەيىن، اتالعان وڭىرلەردە جاڭا ءماسليحاتتار جاساقتالىپ، اۋماقتىق سايلاۋ كوميسسيالارى قۇرىلدى. سوندىقتان وسى جاڭا وڭىرلەر جاناما سايلاۋ قۇقىعى نەگىزىندە پارلامەنت سەناتىنداعى ءوز وكىلدەرىن سايلادى.
وتىرىستا وسك توراعاسىنىڭ ورىنباسارى كونستانتين پەتروۆ سايلاۋ قورىتىندىلارى تۋرالى بايانداما جاسادى.
بايانداماشىنىڭ اقپاراتىنا سايكەس، اباي، جەتىسۋ جانە ۇلىتاۋ وبلىستارىنىڭ اۋماقتىق سايلاۋ كوميسسيالارىنىڭ پارلامەنت سەناتى دەپۋتاتتارىن سايلاۋ جونىندەگى داۋىستاردى ساناۋ ناتيجەلەرى تۋرالى حاتتامالارى نەگىزىندە سايلاۋ وتكىزىلدى دەپ تانىلدى.
بارلىق ءۇش ءوڭىر بويىنشا 346 ءماسليحات دەپۋتاتىنان داۋىس بەرۋگە 311 دەپۋتات قاتىستى. ياعني، بارلىق وڭىرلەردە كۆورۋمعا قول جەتتى.
پارلامەنت سەناتىنداعى ءتيىستى 6 مانداتقا بارلىعى 12 كانديدات ء(ار وبلىستان 4 ادامنان) داۋىسقا تۇسكەن.
داۋىس بەرۋ، وزگە دە سايلاۋ راسىمدەرى سايلاۋ زاڭناماسىنىڭ نورمالارىنا ساي ءوتتى.
سايلاۋ كۇنى ورتسايلاۋكومنىڭ ينتەرنەت-رەسۋرسى ارقىلى تاڭداۋشىلاردى تىركەۋدى جانە داۋىس بەرۋدىڭ الدىن الا قورىتىندىلارىن شىعارۋدى ونلاين بايقاۋ سەرۆيستەرى جۇمىس ىستەدى. ياعني، سايلاۋ پروتسەسىنىڭ اشىقتىعى مەن جاريالىلىعى تولىققاندى قامتاماسىز ەتىلگەن. بۇل پروتسەسس وسك اقپاراتتىق ارنالارى ارقىلى دا جەدەل جاريالانىپ وتىردى.
وتىرىستا ورتالىق سايلاۋ كوميسسياسى «2022 جىلعى 24 تامىزدا وتكىزىلگەن اباي، جەتىسۋ جانە ۇلىتاۋ وبلىستارىنان قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋدىڭ قورىتىندىلارىن انىقتاۋ جانە جاريالاۋ تۋرالى» قاۋلى قابىلدادى.
«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 12, 44 جانە 81-باپتارىنا سايكەس، اباي، جەتىسۋ جانە ۇلىتاۋ وبلىستارىنان قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋ بويىنشا داۋىستاردى ساناۋ ناتيجەلەرى تۋرالى اباي، جەتىسۋ جانە ۇلىتاۋ وبلىستارىنىڭ اۋماقتىق سايلاۋ كوميسسيالارىنىڭ حاتتامالارى نەگىزىندە سايلاۋ قورىتىندىلارى انىقتالدى.
ياعني، قازاقستان رەسپۋبليكاسى پارلامەنتى سەناتىنىڭ دەپۋتاتتارى بولىپ:
· اباي وبلىسىنان:
باياحمەتوۆ باقىتجان كاكەنقادجاۇلى(2017 جىلعى 28 ماۋسىمدا سايلانعان دەپۋتاتتاردىڭ وكىلەتتىك مەرزىمىنە);
ارعىنبەكوۆا اينۇر سەرىكپايقىزى (2020 جىلعى 12 تامىزدا سايلانعان دەپۋتاتتاردىڭ وكىلەتتىك مەرزىمىنە);
· جەتىسۋ وبلىسىنان:
تولاميسوۆ امانگەلدى عابدىلكارىمۇلى (2017 جىلعى 28 ماۋسىمدا سايلانعان دەپۋتاتتاردىڭ وكىلەتتىك مەرزىمىنە);
سارىباەۆ عالياسقار تولەندىۇلى (2020 جىلعى 12 تامىزدا سايلانعان دەپۋتاتتاردىڭ وكىلەتتىك مەرزىمىنە);
· ۇلىتاۋ وبلىسىنان:
مەدەباەۆ سوۆەتبەك تۇرسىنۇلى (2017 جىلعى 28 ماۋسىمدا سايلانعان دەپۋتاتتاردىڭ وكىلەتتىك مەرزىمىنە);
شايداروۆ سەرىك جامانقۇلۇلى (2020 جىلعى 12 تامىزدا سايلانعان دەپۋتاتتاردىڭ وكىلەتتىك مەرزىمىنە) سايلاندى.
قازاقستان رەسپۋبليكاسىنىڭ كونستيتۋتسياسىنا سايكەس پارلامەنت سەناتىنىڭ دەپۋتاتتارى التى جىلعا سايلانادى. سونىمەن قاتار، ولاردىڭ جارتىسى ءاربىر ءۇش جىل سايىن قايتا سايلانىپ وتىرادى.
وسك توراعاسى نۇرلان ءابدىروۆ «قازىرگى ۋاقىتتا پارلامەنت سەناتىندا 2017 جانە 2020 جىلدارى سايلانعان دەپۋتاتتار ءوز وكىلەتتىكتەرىن جۇزەگە اسىرۋدا. اتاپ ءوتۋ قاجەت، 2022 جىلعى 24 تامىزدا وتكەن سايلاۋدا تاڭداۋشىلار – ءماسليحات دەپۋتاتتارى جاناما سايلاۋ قۇقىقتارى نەگىزىندە جاسىرىن داۋىس بەرۋ ارقىلى جاڭا سەناتورلاردىڭ قايسىسى 2017 جانە 2020 جىلدارى سايلانعان دەپۋتاتتاردىڭ وكىلەتتىك مەرزىمدەرىنە روتاتسيا ارقىلى سايلاناتىنىن وزدەرى انىقتادى» - دەپ اتاپ ءوتتى.
«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 44-بابىنا سايكەس 2022 جىلعى 24 تامىزدا اباي، جەتىسۋ جانە ۇلىتاۋ وبلىستارىنان قازاقستان رەسپۋبليكاسى پارلامەنتى سەناتى دەپۋتاتتارىن سايلاۋ قورىتىندىلارى تۋرالى وسك رەسمي حابارلاماسى بۇقارالىق اقپارات قۇرالدارىندا جاريالاناتىن بولادى.
