"بەكبولات تىلەۋحان مۇحامەدجان تازابەكتىڭ ايتقانىن ەكى ەتپەيدى، ونىڭ قوعام الدىنداعى باستى قاتەلىگى دە وسى". بۇل پىكىردى جۋرناليست توقتار جاقاش ءوزىنىڭ فەيسبۋك پاراقشاسىندا قالدىردى، دەپ جازادى "ادىرنا" ۇلتتىق پورتالى.
"اڭگىمە، تاعى دا بەكا مەن مۇحا حاقىندا. وسى ەكى ادامنىڭ ازاماتتىق، ادامشىلىق قاسيەتتەرىن، وبرازىن اشىپ جازعىم كەلگەن. ويتكەنى، كوپشىلىگىمىز ولارمەن جاقىن ارالاسقان جوقپىز. دۇرمەككە ىلەسىپ نە قاتتى جاقسى كورەمىز، نە قاتتى جەك كورەمىز. ءبىز كەيدە باسقا ادام جاساعان كەمشىلىكتى كوپ كەشىرە دە المايمىز. سونىڭ ءبىرى ءوزىم ەكەم. ءبىزدىڭ باستى كەمشىلىگىمىز دە سول شىعار. بەكبولات پەن مۇحامەدجاندى بىرنەشە جىلدان بەرى سىناپ-مىنەپ كەلە جاتىرمىن. بىراق ماسەلەنىڭ ەكىنشى جاعى تاعى بار. ال ەندى سول نارسەگە تۋراسىنا كوشەيىك: بەكبولات پەن مۇحامەدجانمەن الىس-جاقىن ءبىر جىلعا جۋىق ارالاستىم. سول از ۋاقىت جاقىن ارالاسقاندا تانىعانىم: بەكبولات شىعارماشىلىقتىڭ ادامى بولعاسىن با، الدە، جاڭاارقا سياقتى دالانىڭ قازاعى بولعاسىن با، قىزبا، شىرت ەتپە جانە سونىسىمەن قوسا اڭقىلداعان اقكوڭىل ازامات. تىلشىلەرگە سۇقبات بەرگەندە سول اڭعالدىعىمەن سوزدەن ۇستالىپ، كۇلكى بوپ جاتادى. ايتپەسە، ەلدە جۇرگەندە كومەك سۇراپ بارعان جانننىڭ قولىن قايتارعانىن كورمەپپىن. دەپۋتات بولىپ جۇرگەندە كوپبالالى بىرنەشە ايەلگە اي سايىن جالاقىسىنان ءبولىپ اقشا جىبەرىپ تۇردى. ونىسىن باسقالار سياقتى جارنامالاپ، دابىرا قىلعان جوق. ءۇن-ءتۇنسىز، ءوزىنىڭ 15 بالاسىمەن قوسىپ، تانىمايتىن بىرەۋلەردىڭ شيەتتەي بالا-شاعاسىن باقتى. ءوزى ايتپاقشى، نازارباەۆ رەجيمىندە تالاي رەت تاياق تا جەدى. باياعىدا پرەمەر-مينيستر بوپ تۇرعان ماسىموۆكە "قازاقشا سويلەڭىز" دەگەنى ءۇشىن دەپۋتاتتىق مانداتتان ايىرىلىپ، بىرنەشە جىل قوڭىز دا تەرىپ كەتە جازدادى. ول كەزدە جۇيە سونداي بولاتىن. قارسى كەلگەندى قىلعىندىرىپ، كونبەگەندى كومىپ تاستاپ وتىردى. ارينە، بۇل اقتاۋعا بولاتىن سەبەپ ەمەس. دەگەنمەن، ادامنىڭ سول ۋاقىتتاعى بولمىسىن، مىنەز-قۇلقىن تۇسىندىرەتىن فاكت. ال مۇحامەدجان بولسا، ءبىلىمى اسا تەرەڭ ەمەس، بىرەۋگە جاقسىلىق جاساۋدان بۇرىن "ودان كەيىن قانداي پايدا بار؟" دەپ ون ولشەپ، ءجۇز تولعاناتىن، ءاربىر ارەكەتىن تەك باقاي ەسەپكە قۇراتىن ايلاكەر ازامات. مۇحامەدجاننىڭ ءىس-ارەكەتىن ساراپتاعاندا مەنىڭ كوز الدىما گاي يۋلي تسەزاردىڭ كاسسي دەگەن كەڭەسشىسى ەلەستەپ تۇرادى. ناعىز يدەولوگيا سالاسىندا جۇمىس ىستەيتىن ادام. نەگە ەكەنىن بىلمەيمىن، بىراق بەكبولات مۇحامەدجاننىڭ ايتقانىن ەكى ەتپەيدى. تاق تۇرادى. بەكبولاتتىڭ قوعام الدىنداعى باستى قاتەلىگى دە وسىندا سياقتى", - دەپ جازدى جۋرناليست.
"ادىرنا" ۇلتتىق پورتالى
