الماتى قالاسى ىشكى ساياسات باسقارماسىنىڭ قولداۋىمەن «ادىرنا» ۇلتتىق-ەتنوگرافيالىق بىرلەستىگى «تاريحتان تاعىلىم» جوباسى اياسىندا، ساياسي قۋعىن-سۇرگىن جانە اشارشىلىق قۇرباندارىن ەسكە الۋ ماقساتىندا الماتى قۇرىلىس جانە حالىقتىق كاسىپشىلىك كوللەدجىندە احمەت بايتۇرسىنۇلىنىڭ ۇرپاعى ايمان بايسالقىزىمەن كەزدەسۋ وتكىزدى.
كەزدەسۋ الدىندا قۇرمەتتى قوناق ايمان بايسالقىزى مەن «ادىرنا» ۇلتتىق-ەتنوگرافيالىق بىرلەستىگىنىڭ قىزمەتكەرلەرى كوللەدجدىڭ ستۋدەنتتەرى جاساعان قولونەر بۇيىمدار جانە قازاقتىڭ ۇلتتىق اسپاپتار كورمەسىمەن تانىستى.
كەزدەسۋگە فيلولوگيا عىلىمدارىنىڭ كانديداتى، ا.بايتۇرسىنۇلىنىڭ ادەبي مۇراسىن زەرتتەۋشى ايسۇلۋ ويسىلباي حانىم مەن مادەنيەتتانۋشى بەردالى وسپان مىرزا قاتىستى.
جۇزدەسۋ تالانتتى كوللەدج ستۋدەنتىنىڭ دومبىرادا ويناعان كۇيىمەن باستالدى. ايمان حانىم ءوز ءسوزىن: “احمەت بايتۇرسىنۇلىنىڭ ۇرپاعى رەتىندە قۇرمەتتەپ وسىندا شاقىرعاندارىڭىزعا كوپ راقمەت. مەن 1936-جىلى تۋىلىپ ءبىر جىلدان سوڭ اتام احمەت بايتۇرسىنۇلى اتىلىپ كەتتى، ەسىمدى بىلگەلى انام شولپان ءار ايماقتا، ءبىر جەرگە تۇراقتاماي كوشىپ جۇردىك”، — دەپ باستادى. اتاسى احمەت بايتۇرسىنۇلىنىڭ ءوزىن كىشكەنتاي كەزدە موينىنا مىنگىزىپ، تالاي ەركەلەتىپ ويناتقانىن ايتىپ جانە باسقا دا كوپتەگەن جان تەبىرەنتەرلىك ەستەلىكتەرىمەن ءبولىستى. ءسوزىنىڭ سوڭىندا اتاسىنىڭ حالىق اراسىندا بۇگىنگە دەيىن ۇمىتىلماي ايتىلىپ جۇرگەن «اققۇم» ءانىن ورىنداپ كوزىنە جاس الدى. جاسى 83-تەگى سىيلى قوناقتىڭ جۇرەكجاردى ءانىن تىڭداعان جۇرتشىلىق ريزاشىلىقپەن ۇزاق قول شاپالاقتادى.
ءوز كەزەگىندە ايسۇلۋ ويسىلباي حانىم ا. بايتۇرسىنۇلىنىڭ تۋعان ەلى ءۇشىن سىڭىرگەن ەڭبەكتەرى مەن رۋحاني ەرلىكتەرىن جىپكە تىزگەندەي اڭگىمەلەپ بەردى.
بەردالى وسپان مىرزا سول جىلدارداعى الاش ارداقتىلارى، قازاق ەلىنىڭ تاۋەلسىزدىگىن ارمانداي وتىرىپ، الداعى 100-200 جىلعا جوسپار قۇرىپ، بولاشاق ءۇشىن ەڭبەك ەتىپ كەتكەندىگىن تىلگە تيەك ەتتى. ا.بايتۇرسىنۇلى تۋرالى اڭگىمەسىندە ۇلى تۇلعانىنىڭ قازاق ەلىنە اتى بەلگىلى ۇل-قىزدارىنا تىكەلەي كومەكتەسكەنى تۋرالى قىزىقتى وقيعالاردى باياندادى. احمەت بايتۇرسىنۇلىنىڭ بۇگىنگى ەلىمىزدىڭ تاۋەلسىزدىك الۋىنا ۇلكەن ۇلەس قوسقانىندا اتاپ ايتتى.
ساحناعا شىققان تاريح ءپانىنىڭ ۇستازى ايجامال ءورىنالى ايمان بايسالقىزىنا سول جەردە ارناپ شىعارعان ولەڭىن وقىدى. قوناقتار تاعىدا قوشەمەتكە بولەندى. كەزدەسۋ بارىسىندا كوللەدج ستۋدەنتتەرى احمەت بايتۇرسىنۇلىنىڭ ولەڭدەرىن وقىپ، ءان شىرقاپ، جىر ارنادى. كەش سوڭىندا وقۋ ورنىنىڭ ۇجىمى قازاقتىڭ ۇلى دا ءور تۇلعاسى احمەت بايتۇرسىنۇلىنىڭ نەمەرەسى ايمان بايسالقىزىمەن قيماي قوشتاستى.
«ادىرنا» ۇلتتىق پورتالى
