"قاراقات ابدەنگە سايلاۋ ناۋقانىنان باس تارتىپ، مەنىڭ شتابىما قوسىلۋعا شاقىرامىن". بۇل پىكىردى پرەزيدەنتىككە كانديدات سالتانات تۇرسىنبەكوۆا ايتتى، دەپ جازادى "ادىرنا" ۇلتتىق پورتالى.
"قاراقات ابدەنگە سايلاۋ ناۋقانىنان باس تارتىپ، مەنىڭ شتابىما قوسىلۋعا شاقىرامىن. ابدەن قاراقات جاقسىلىققىزىنىڭ باعدارلاماسىن تالداپ، كەزدەسۋلەرىن ساراپتاي كەلە، كەي تۇستاردا ويىمىز توعىساتىنىن تۇسىنەمىن. ەكەۋمىز دە ايەلدىڭ قوعامداعى ورنىن، ونىڭ ماڭىزدىلىعىن ايتىپ ءجۇرمىز. بىراق ايتا كەتەيىن، قاراقات جاقسىلىققىزىنىڭ ساياسي تاجىريبەسى از، سايلاۋشىلارمەن كەزدەسۋلەردە ونىڭ باعدارلاماسىنىڭ ءجون-جوسىعىن ءتۇسىندىرىپ، مادەني-بۇقارالىق ءىس-شارالارى ءۇشىن تۇسىنىكتەمە بەرۋىمە تۋرا كەلەدى. قاراقاتتى ءوز كومانداما شاقىرامىن. ايەلدەردىڭ داۋىسى باسىم ءارى انىق شىعۋى ءۇشىن ءبىز بىرىگۋىمىز كەرەك", - دەيدى سالتانات تۇرسىنبەكوۆا.
ول سايلاۋشىلاردىڭ داۋىسىن ەكىگە بولمەۋگە شاقىردى.
"سايلاۋشىلاردىڭ داۋىسىن ەكىگە بولمەي-اق قويايىق. قاراقات جاقسىلىققىزى، سايلاۋ ناۋقانىنان باس تارتىپ، مەنىڭ كومانداما، شتابىما قوسىلىڭىز. ايەلدەر مەن وتباسىنىڭ مۇددەسىن العا جىلجىتۋعا بىرگە كۇش سالايىق! ونىڭ ۇستىنە، مەنىڭ قارسىلاسىم ۇسىناتىن باستامالاردىڭ كوبى مەنىڭ سايلاۋالدى باعدارلامامنىڭ ءبىر بلوگىندا عانا – «حالىقتى الەۋمەتتىك قورعاۋدا» قامتىلعان. دەگەنمەن، مەن سوت-قۇقىقتىق رەفورمانى، مەملەكەتتىك ينستيتۋتتاردى دەموكراتيالاندىرۋدى، ازاماتتىق قوعامدى دامىتۋ ءۇشىن ەلەۋلى وزگەرىستەردى دە ۇسىنامىن. سونىمەن قاتار، مەن قۇقىق قورعاۋشىمىن، كوپ جىلدار بويى ايەلدەردىڭ قۇقىعىن قورعاۋمەن اينالىسىپ كەلەمىن. قازاق ايەلىنە، قازاق وتباسىنا نە كەرەك ەكەنىن بەس ساۋساعىمداي بىلەمىن. تاعى دا قايتالاپ ايتامىن، قاراقات جاقسىلىققىزى، مەنىڭ كومانداما قوسىلىڭىز، بىرگە جۇمىس ىستەپ، ۇسىنىستارىڭىزدى سايلاۋشىلارعا جان-جاقتى جەتكىزۋگە ۋادە بەرەمىن", - دەيدى پرەزيدەنتىككە ۇمىتكەر سالتانات تۇرسىنبەكوۆا.
"ادىرنا" ۇلتتىق پورتالى
