«ادىرنا» ۇلتتىق-ەتنوگرافيالىق بىرلەستىگى الماتى قالاسى ىشكى ساياسات باسقارماسىنىڭ قولداۋىمەن ستۋدەنتتەر اراسىندا 1986 جىلعى جەلتوقسان كوتەرىلىسىنىڭ قايراتكەرلەرىنە ارنالعان 2 تۋرنير ۇيىمداستىردى.
ءبىرىنشى تۋرنير توعىزقۇمالاقتان قازاق باس ساۋلەت-قۇرىلىس اكادەمياسىندا ءوتتى. «حالىق قاھارمانى» قايرات رىسقۇلبەكوۆتى ەسكە الۋعا ارنالعان قالاداعى جارىسقا ءارتۇرلى جوو-لاردان 20-دان استام ستۋدەنت قاتىستى. تۋرنير ناتيجەسىندە 1-ورىندى م.قۇرىلىس، 2-ورىندى ءا.تۇرلىعۇل، 3-ورىندى ە.قۋانىشباەۆ يەلەندى.
ەكىنشى تۋرنير جەلتوقسان كوتەرىلىسىنىڭ تاعى ءبىر قايراتكەرى ەربول سىپاتاەۆتى ەسكە الۋعا ارنالدى. قازاقس سپورت جانە تۋريزم اكادەمياسىندا قازاق كۇرەسىنەن وتكەن جارىسقا سالماعى 80 كيلوگراممنان جوعارى بالۋاندار قاتىستى. بوز كىلەمدە بەلدەسكەن بالۋاندار جارىسىندا ك.ورىنباسار 1-ورىن السا، 2-ورىندى م.بەردىعالي ەنشىلەدى، 3-ورىندى ن.وڭالباي قانجىعاسىنا بايلادى.
«ادىرنا» ۇلتتىق-ەتنوگرافيالىق بىرلەستىگىنىڭ ديرەكتورى ارمان اۋباكىردىڭ ايتۋىنشا ەكى ءتۋرنيردىڭ دە ۇلتتىق سپورت تۇرلەرىنەن وتكىزىلۋىنىڭ وزىندىك سەبەبى بار.
«ءبىزدىڭ ۇيىم 10 جىلدان بەرى ۇلتتىق-ەتنوگرافيالىق باعىتتا جۇمىستار اتقارىپ كەلەدى. سوندىقتان ۇنەمى ءىس-شارالاردىڭ ۇلتتىق قىرىنا باسىمدىق بەرەمىز. الماتى قالاسى ىشكى ساياسات باسقارماسىمەن تاپسىرماسىمەن بىرنەشە جوبالاردى جۇزەگە اسىرىپ جاتىرمىز. سولاردىڭ ءبىرى 1986 جىلعى جەلتوقسان قاتىسۋشىلارىنا ارنالعان «پاتريوتتىق رۋح – باستى قۇندىلىق» جوباسى. توعىزقۇمالاق پەن قازاق كۇرەسىنەن ءوتىپ جاتقان تۋرنيرلەر وسى جوبا اياسىندا ۇيىمداستىرىلىپ وتىر»، دەيدى ول.
ەكى ءتۋرنيردىڭ دە جەڭىمپازدارى مەدالدارمەن باعالى سىيلىقتارمەن، ارنايى ديپلومدارمەن ماراپاتتالدى.
ب.وسپان
