«اتاجۇرت» ەرىكتىلەر ۇيىمىنىڭ جەتەكشىسى سەرىكجان ءبىلاشتىڭ ۇستىنەن قىلمىستىق كودەكستىڭ 174 بابى – «ارازدىق قوزدىرۋ» ايىبى بويىنشا قىلمىستىق ءىس قوزعالدى. بۇل تۋرالى bureau.kz حابارلاپ وتىر.
قىلمىستىق ءىستى قوزعاۋعا 18 ادام قول قويعان ۇجىمدىق حات نەگىز بولعان. ازىرشە سەرىكجان ءبىلاشتى ءبىر رەت تەرگەۋ امالدارىنا شاقىرعان.
سەرىكجان ءبىلاش – قىتايدان قازاقستانعا ورالعان ەتنيكالىق قازاق. ونىڭ "اتاجۇرت" قوزعالىسى (الماتىدا ورنالاسقان) قازاقستانعا ورالعان قانداستارىمىزعا زاڭدىق كومەك كورسەتەدى. جۇمىستارىنىڭ نەگىزگى باعىتى قىتايداعى ەتنيكالىق قازاقتاردىڭ جانايقايىنا ەلىمىز بەن شەتەلدەردىڭ نازارىن اۋدارتۋ. سولاردىڭ ىشىندەگى ەڭ تانىمالى – «اتاجۇرتتىڭ» قولداۋىنا بايلانىستى قوعامدا رەزونانس تۋدىرعان سايراگۇل ساۋىتبايعا قاتىستى ءىسى. سايراگۇل ساۋىتباي قازاقستاندىق شەكارانى زاڭسىز كەسىپ وتكەنى ءۇشىن سوتقا تارتىلىپ، ونى سوت پروتسەسى كەزىندە بەلگىلى زاڭگەر ابزال قۇسپان ءوز قورعاۋىنا العان بولاتىن. قازىرگى كەزدە سايراگۇل ساۋىتباي «پانا ىزدەۋشى تۇلعا» مارتەبەسىندە ءجۇر (ونىڭ مارتەبەسى 2019 جىلدىڭ 25 ساۋىرىنە دەيىن سوزىلدى).
"ادىرنا" ۇلتتىق پورتالى
