توبەلەسكە قاتىسقان بەس پوليتسەي ىشكى ىستەر ورگاندارىنان بوساتىلدى. بۇل تۋرالى استانا پوليتسيا دەپارتامەنتىنىڭ ءباسپاسوز قىزمەتىنىڭ وكىلدەرى مالىمدەدى، - دەپ حابارلايدى Tengrinews.kz ءتىلشىسى.
"توبەلەسكە قاتىسقان بەسەۋى - ەكى ينسپەكتور جانە جول پاترۋلدىك پوليتسياسىنىڭ ءۇش قىزمەتكەرى ىشكى ىستەر ورگاندارىنان بوساتىلدى", - دەلىنگەن ءباسپاسوز قىزمەتىنىڭ حابارلاماسىندا. تەكسەرىس ناتيجەسىندە جول-پاترۋلدىك پوليتسياسى روتا كومانديرى اتقارىپ وتىرعان قىزمەتىنەن بوساتىلعانى، ال جول-پاترۋلدىك پوليتسيا باسشىلىعى تارتىپتىك قاتاڭ جاۋاپكەرشىلىككە تارتىلعانى ايتىلادى.
وسىعان دەيىن قر ىشكى ىستەر مينيسترلىگى جەلىدە پايدا بولعان ۆيدەوعا بايلانىستى قىزمەتتىك تەكسەرىس جۇرگىزىپ جاتقانى حابارلانعان. الەۋمەتتىك جەلىدە تارالعان بەينەجازبادا ەكى جول پوليتسەيى قارىم-قاتىناستارىن توبەلەس ارقىلى شەشكەن. ءدال سول ۋاقىتتا ولاردىڭ ماڭىندا ارىپتەستەرى توبەلەسكە ارالاسپاي، قاراپ تۇرعان.
الماس سادۋباەۆ پوليتسيا قىزمەتكەرىنىڭ كەز كەلگەن قىزمەتتىك ءتارتىبىن بۇزاتىن جات قىلىقتىڭ دۇرىس ەمەس ەكەنىن ايتتى. "بۇل جاعدايلار ءبىزدىڭ ابىرويىمىزدى وسىرمەيدى. پوليتسەيلەر توبەلەسكەن ۆيدەوعا قاتىستى قىزمەتتىك تەكسەرىس جۇرگىزىلىپ جاتىر. ولارعا جانە باسشىلارىنا زاڭدا كورسەتىلگەن شارالار قولدانىلادى. تەكسەرۋدىڭ ناتيجەسىن جاريالايمىز", - دەدى ۆەدوسمتۆونىڭ رەسمي وكىلى.
