قر ەنەرگەتيكا ءمينيسترى الماسادام ساتقاليەۆ سىرتقى ساۋدا، ەكونوميكالىق تارتىمدىلىق جانە شەتەلدەگى فرانتسۋز ازاماتتارى ماسەلەلەرى جونىندەگى فرانتسيا رەسپۋبليكاسىنىڭ دەلەگات – ءمينيسترى وليۆە بەشتپەن كەزدەستى، دەپ حابارلايدى "ادىرنا" پورتالى، قر ەنەرگەتيكا مينيسترلىگىنە سىلتەمە جاساپ.
كەزدەسۋ بارىسىندا قازاقستانداعى اتوم ەنەرگەتيكاسىن دامىتۋ پەرسپەكتيۆالارى تالقىلاندى.
حابارلانعانداي، فرانتسۋز تاراپى قازاقستاندا ءبىرىنشى اتوم ەلەكتر ستانساسىن سالۋ جوباسىن جۇزەگە اسىرۋدا، سونداي-اق شاعىن مودۋلدىك رەاكتورلاردى دامىتۋ پەرسپەكتيۆالارىن زەردەلەۋدە ىنتىماقتاستىققا دايىن ەكەنىن ءبىلدىردى.
سونداي-اق مينيسترلەر ەكى ۇكىمەتتىڭ ەنەرگەتيكالىق اۋىسۋ جانە جاھاندىق جىلىنۋعا قارسى كۇرەس سالاسىنداعى مىندەتتەمەلەرىنە توقتالدى.
سونىمەن قاتار، الماسادام ساتقاليەۆ پەن وليۆە بەشت «ميرنىي» جوباسىنىڭ (ميرنىي كەنتىندە قۋاتى 1 گۆت جەل ەلەكتر ستانتسياسىنىڭ قۇرىلىسى جوباسى) سوڭعى جايتتارى تۋرالى بايانداپ، جوبا اياسىنداعى ەلەكتر ەنەرگياسىنىڭ ءتاريفى بويىنشا بىرلەسكەن مالىمدەمەگە قول قويدى.
"ادىرنا" ۇلتتىق پورتالى
