بيىل ۇلى وتان سوعىسفنداعى جەڭىسكە 78 جىل تولىپ وتىر. وسىعان وراي، سىر وڭىرىنەن شىققان ۇلى وتان سوعىسىنىڭ 6 ارداگەرىنە مەملەكەت تاراپىنان 1,5 ملن.تەڭگە كولەمىندە ءبىر رەتىك جاردەماقى بەرىلمەك. بۇعان قوسا، تىلدا ەڭبەك ەتكەن ەكى مىڭنان اسا ازامات پەن ولارعا تەڭەستىرىلگەن جاندارعا 138 مىڭ تەڭگە كولەمىندە قارجى تولەنەدى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى عابيت جاڭاباەۆ حابارلادى.
- جىل سايىن ۇلى وتان سوعىسى ارداگەرلەرىنە بارىنشا الەۋمەتتىك قولداۋ شارالارى جۇرگىزىلۋدە. بيىل دا بۇل ۇردىستەن جاڭىلماي وڭىرىمىزدەن شىققان باتىر ارداگەرلەرىمىزدى قۇرمەتتەۋ شارالارى ۇيىمداستىرىلادى. قازىرگى تاڭدا ايماعىمىزدا 6 ۇلى وتان سوعىسىنىڭ ارداگەرى مەن ولارعا تەڭەستىرىلگەن 4 177 ازامات بار. ولارعا مەملەكەت تاراپىنان اي سايىن ورتا ەسەپپەن 178 مىڭ تەڭگە زەينەتاقى جانە 55 200 تەڭگە ارناۋلى مەملەكەتتىك جاردەماقى تولەنۋدە. ال سوعىس جىلدارىندا قاجىرلى ەڭبەگى مەن ءمىنسىز اسكەري قىزمەتى ءۇشىن بۇرىنعى كەڭەستىك سوتسياليستىك رەسپۋبليكالار وداعى وردەندەرىمەن جانە مەدالدارىمەن ماراپاتتالعان 10 ارداگەرگە 207 مىڭ تەڭگە كولەمىندە قارجىلاي جاردەماقى بەرىلەدى. سونىمەن قاتار مامىر ايىنىڭ 6-10 ارالىعىندا ارداگەرلەرگە ارنالعان قايىرىمدىلىق اكتسياسىن ۇيىمداستىراتىن بولامىز، - دەدى باسقارما باسشىسى عابيت جاڭاباەۆ.ايتا كەتەيىك، 5 مامىر كۇنى ن.بەكەجانوۆ اتىنداعى قىزىلوردا وبلىستىق قازاق اكادەميالىق مۋزىكالىق دراما تەاترىندا ۇلى جەڭىستىڭ - 78 جىلدىعىنا ارنالعان سالتاناتتى شارا وتەدى. ال 9 مامىر كۇنى قالاداعى «ماڭگىلىك الاۋ» مەموريالىنا سالتاناتتى تۇردە گۇل شوقتارىن قويۋ ءراسىمى وتكىزىلەدى.
