2023 جىلعى بوكستان الەم چەمپيوناتى كەزىندە 54 كەلى سالماقتا بوكستان ماحمۇد سابىرحان الەم چەمپيونى اتاندى. ونى ماراپاتتاۋ كەزىندە دە ءانۇراننىڭ ۇزىندىسىنەن كەيىن قالعانىن كورەرمەندەر جالعاستىرىپ اكەتتى، دەپ حابارلايدى “ادىرنا” ۇلتتىق پورتالى.
بۇدان الدىن 48 كەلى سالماقتا 19 جاستاعى قازاقستاندىق سانجار تاشكەنباي جەڭىمپاز اتانعان كەزدە دە وسىعان ۇقساس جاعداي بولعان. ءانۇراننان ءۇزىندى بەرىلگەندە قالعانىن جينالعان كورەرمەن شىرقاپ اكەتكەن.
ەپيزود ءتۋرنيردىڭ تىكەلەي ترانسلياتسياسىنا تۇسكەن. جانكۇيەرلەر ءانۇران اۋەنى جارتىسىنا كەلگەن كەزدە توقتاتىلسا دا، تولىق ورىنداۋدى ءجون كورگەن.
ۇيىمداستىرۋشىلار بارلىق ەلدىڭ ءانۇراندارىن قىسقارتىپ بەرگەن. الايدا، قازاق جانكۇيەرلەرىنىڭ كوپتىگى، ءبىراۋىزدان ءانۇراندى شىرقاي كەتۋى شەتەلدىكتەردى ءتانتى ەتكەن.
