قاسىم-جومارت توقاەۆ بوكستان وتكەن الەم چەمپيوناتىنىڭ جۇلدەگەرلەرىمەن جۇزدەستى

7172
Adyrna.kz Telegram

مەملەكەت باسشىسى قاسىم-جومارت توقاەۆ بوكستان تاشكەنت قالاسىندا وتكەن الەم چەمپيوناتىنىڭ جۇلدەگەرلەرىن قابىلدادى، دەپ حابارلايدى "ادىرنا" ۇلتتىق پورتالى.

پرەزيدەنت قاسىم-جومارت توقاەۆ بوكستان وزبەكستاننىڭ  تاشكەنت قالاسىندا وتكەن  الەم چەمپيوناتىنىڭ جەڭىمپازدارى – سانجار تاشكەنباي، ماحمۇد سابىرحان، اسلانبەك شىمبەرگەنوۆ، نۇربەك ورالباي جانە كۇمىس مەدال يەگەرى دۋلات بەكباۋوۆتى، سونداي-اق بوكستان قازاقستان ۇلتتىق قۇراماسىنىڭ مۇشەلەرى مەن باپكەرلەرىن قابىلدادى.

– الەمدىك جارىستا ءتورت  التىن، ءبىر كۇمىس مەدال الۋ – زور جەتىستىك. قازاق جىگىتتەرى الەم چەمپيونى اتانىپ، ەلىمىزدىڭ مەرەيىن ءوسىردى. وسى مۇمكىندىكتى پايدالانا وتىرىپ، بارلىق جانكۇيەرلەرگە العىسىمدى بىلدىرەمىن. ولاردىڭ داۋىسى سوناۋ تاشكەنت تورىنەن انىق ەستىلدى. ءدال وسىنداي شىنايى قولداۋ سپورتشىلارىمىزعا ايرىقشا كۇش بەرگەنى ءسوزسىز.   سپورت دوداسىن بۇكىل حالقىمىز كوردى، سىزدەرگە تىلەكشى بولدى  دەپ ايتساق، ارتىق بولمايدى. مەن دە فينالداعى جەكپە-جەكتەردى تۇگەل كوردىم. جىگىتتەرىمىز ەل نامىسىن قورعاۋ ءۇشىن بار كۇشىن سالىپ ايقاستى. جەلبىرەگەن كوك تۋىمىزبەن جانە انۇرانىمىزبەن بىرگە حالقىمىزدىڭ رۋحى كوتەرىلدى. ۇلتتىڭ اسقاق رۋحى جانە وتانشىلدىق قاسيەتى دەگەنىمىز – وسى! ويتكەنى سپورتشىلارىمىزدىڭ ءاربىر جەڭىسى ەلدى قاناتتاندىرادى.  شىن مانىندە، وتكەن جەكسەنبى قازاق بوكسىنىڭ اسىعى الشىسىنان تۇسكەن كۇن بولدى. مۇحيتتىڭ ار جاعىندا جانىبەك ءالىمحانۇلى چەمپيوندىق اتاعىن ابىرويمەن قورعادى. ونىڭ جەڭىستى جولى  تاشكەنتتە جالعاستى. وسىنىڭ ءبارى بارشا قازاقتىڭ مەرەيىن تاسىتتى، – دەدى پرەزيدەنت.

پرەزيدەنت سپورتشىلاردى جارقىن جەڭىسىمەن قۇتتىقتاپ، ولاردىڭ جارقىن جەتىستىكتەرى كۇللى ەلىمىز ءۇشىن ايتۋلى وقيعا ەكەنىن اتاپ ءوتتى. جەڭىمپازدارعا الداعى بايراقتى باسەكەلەردە ەل نامىسىن ابىرويمەن قورعايتىنىنا سەنىم ءبىلدىردى.

سونىمەن قاتار، قازاقستان بوكس فەدەراتسياسىنىڭ باسشىلىعىنا، سپورتشىلار مەن باپكەرلەرگە قازاقستان رەسپۋبليكاسى پرەزيدەنتىنىڭ العىس حاتتارى مەن قۇرمەت گراموتالارىن تابىستادى.

"ادىرنا" ۇلتتىق پورتالى

پىكىرلەر