باتپاققا باتقان بقو سپورتى

ورالبەك قوجاگەلدين، اسقار شايحيەۆ، قونىس جەتپىسوۆ، ەربولات بايباتىروۆ-تاي بالۋاندارى مەن دانيار ەلەۋسىنوۆ، داۋرەن ەلەۋسىنوۆتەي بوكسشىلارى باتىس قازاقستان ءوڭىرىنىڭ عانا ەمەس، كۇللى قازاق ەلىنىڭ ماقتانىشتارى ەدى. ەدى دەپ وتكەن شاقپەن ەسكە الىپ وتىرعانىمىز بۇگىنگى ورال سپورتىنىڭ جاعدايىنا قاراپ قارنىڭنىڭ اشقانىنا ەمەس، قادىرىڭنىڭ قاشقانىنا جىلايدى ەكەنسىڭ. جاقىندا عانا ۇلتتىق سپورت تۇرلەرىنەن قىزىلوردادا جاستار اراسىندا ەل چەمپيوناتى مارەگە جەتتى. باتىس قازاقستان وبلىسى وسى بايراقتى باسەكەدە كوماندالىق ەسەپتە سەگىزىنشى ورىنعا ءىلىندى. ىلىنگەنىنە ءتاۋبا دەۋگە بولادى. اتى ايتىپ تۇرعانداي ۇلتتىق سپورت بولعاندىقتان بۇندا سالماق پەن كۇش اتقا تۇسەدى. ال، باتىستىق سپورتشىلار وسى جارىسقا 21 ادام 7 اتپەن بارعان. 3 ادام ءبىر اتقا مىنگەسكەن سوڭ جاعداي بەلگىلى عوي. كوكپاردان ماڭعىستاۋدان 12:0 ەسەبىمەن ويسىراي ۇتىلسا، قىزىلوردا قۇراماسىنان 12:3 ەسەبىمەن تاس-تالقان بولدى. نەگىزى، ورالداعى ات سپورتى مەكتەبىندە 38 ات پەن اتتاردى تيەپ اپاراتىن كاماز كولىگى دە بار. بىراق، اقشا ۇنەمدەۋ ماقساتىمەن (!) 7 عانا ات اپارىپ، قالعان اتتاردى قىزىلوردادان جالعا الىپتى.  جۇگەن ۇستاعان شاباندوزدار جارىسقا دايىندالۋدىڭ ورنىنا اۋىل-اۋىلدان ات ىزدەگەن! جامبى اتۋدان ىرىكتەۋدەن دە وتپەي قالعان. بۇرىننان قۇرىش بىلەكتى بالۋانداردىڭ مەكەنى سانالاتىن باتىس قازاقستان دزيۋدودان جاسوسپىرىمدەر اراسىنداعى اتىراۋداعى ەل بىرىنشىلىگىندە  15 كوماندانىڭ ىشىنەن 15 ورىن الدى. جاقىندا عانا شىمكەنت قالاسىندا وتكەن كۇرەس تۇرلەرىنەن وتكەن ەل چەمپيوناتىندا باتىس قازاقستان وبلىسى تاعى كوش سوڭىنان كورىندى. نەگىزىندە، بىلتىر ماڭعىستاۋدا وتكەن قر پرەزيدەنتى ن. نازارباەۆتىڭ جۇلدەسىنە ارنالعان VI حالىق سپورتى ويىندارىنان ناتيجە شىعارۋ كەرەك ەدى. سول كەزدە بقو 17 وبلىس پەن قالالاردىڭ ىشىنەن 17 ورىن العان بولاتىن. بيىلعى كۇرەس تۇرلەرى سپارتاكياداسىندا دا سوڭعى وزدەرىنىڭ «مەنشىكتەپ» العان ورىندارىندا كەلە جاتىر. «اقجايىق» فۋتبول كلۋبى جايلى جازاتىن بولساق جانكۇيەرلەرى جىلاعاندى قويىپ، جوقتاۋ ايتۋعا بار. بىلتىر ەل چەمپيوندارى «استانانى» اقسايدا 3:0-مەن تىزەرلەتىپ، «ەرتىس» پەن «قايراتتى» ۇپايسىز قالدىرعان اياقدوپشىلار جايىق جاعاسىن تىك تۇرعىزىپ ەدى. باسشىلىقپەن كەلىسپەگەن ۋكراينالىق باپكەر ۆلاديمير مازيار ماۋسىم ورتاسى بولماي ورنىنان كەتتى. «اقجايىق» تا ءوزىنىڭ تاز قالپىنا ءتۇسىپ، پرەمەر-ليگادان ۇشىپ كەتكەن بولاتىن. كەزىندە، كەزىندە بولعاندا وسىدان 10 جىل بۇرىن بقو سپورتى تۇلەپ سالا بەردى. سامبودان الەم كۋبوگى دا اقجايىق جاعاسىندا وتكەنىن كوزى قاراقتى سپورت جانكۇيەرلەرى جاقسى بىلەدى. باتىس سپورتىنىڭ كۇرە تامىرىنا قان جۇگىرتكەن ءمۇسىلىم وڭداعانوۆ بولاتىن. ءبارى دە باسشىعا بايلانىستى ەكەنىن قازىرگى مەنەدجەرلىك-ۇيىمداستىرۋشىلىق جۇيەگە كوشكەن سپورت سالاسى دالەلدەپ وتىر. باتىس قازاقستان وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى قىزمەتىنە امانباەۆا ءاسيا راحىمقىزى كەلگەنىنە بيىل ەكى جىل تولدى. وسى ەكى جىلدىڭ ىشىندە بىلىكتى باپكەرلەردىڭ كوبى «ءوز ەركىمەن» قىزمەتتەن كەتتى. دۇرىسى، كەتىردى. كادرلاردىڭ قادىرىنە جەتپەگەن باسشىنىڭ كەسىرىنەن كوپتەگەن بىلىكتى ماماندار باسقا جەرگە قىزمەتكە اۋىسسا، ءبىراز سپورتشىلار وزگە ايماقتىڭ اتىنان سىنعا ءتۇسىپ ءجۇر. بقو دەنە شىنىقتىرۋ جانە سپورت باسقارماسى امانباەۆا ءاسيا راحىمقىزىنىڭ قولىنان "وققا" ۇشقاندار:

1. بقو دەنە شىنىقتىرۋ جانە سپورت باسقارماسى باسشىسىنىڭ ورىنباسارى دينارا ەسەنعاليەۆا
2. بقو دەنە شىنىقتىرۋ جانە سپورت باسقارماسىنىڭ باس بۋحگالتەرى نۇربولات قىلىشەۆ
3. باس مامان بۋحگالتەر ەكونوميست ساۋلە باتىرعاليەۆا
4. سپورت بويىنشا باس مامان جايساڭ عۇبايدۋللين
5. اقجايىق فۋتبول كلۋبىنىڭ ديرەكتورى ازات قازيحانوۆ
6. بوكس مەكتەبىنىڭ ديرەكتورى نۇرجان كارىمجانوۆ
7. وليمپيادا رەزەرۆىن دايارلاۋ ورتالىعىنىڭ ديرەكتورى گاليب دجافاروۆ
8. سپورت-ينتەرنات ديرەكتورى قانات جاڭعاليەۆ
9. ات سپورتى مەكتەبىنىڭ ديرەكتورى داستان مىرزاعاليەۆ
10. بوكس سپورت مەكتەبى ديرەكتورىنىڭ ورىنباسارى ليليا قۇرمانوۆا
11. مۇگەدەكتەر سپورت كلۋبى ديرەكتورىنىڭ ورىنباسارى داۋرەن قابدولوۆ
12. اۆياتسيا سپورت مەكتەبىنىڭ ديرەكتورى ەرگەن ورىنباساروۆ

«اقجايىق» فۋتبول كلۋبىنا ديرەكتور بولىپ ازات قازيحانوۆتىڭ ورنىنا كەلگەن نۇرتازا ءابىلحانوۆتى دا وسى تىزىمگە قوسۋعا بولادى. مۇز سپورت سارايىنىڭ ديرەكتورى ەسقابىل جالمۇرزيەۆتى دەنساۋلىعىنا بايلانىستى ەم قابىلداپ جۇرگەن كەزىندە  جۇمىستان شىعارىپ، ارتى داۋعا اينالىپ، زاڭ ورىندارىنا جۇگىنگەن جالمۇرزيەۆ قايتادان جۇمىسىنا ورالدى. جوعارىداعى ازاماتتار دا  قازاقشىلىققا سالىنباي زاڭ ورىندارىنا ارىزدانسا قىزمەتتەرىندە قالاتىن ەدى. جالپى، باتىس قازاقستان وبلىسى سپورتىنىڭ سوڭعى كەزدەگى «جەتىستىكتەرىنە» ءوڭىر سپورتىنىڭ ارداگەرلەرى مەن جانكۇيەرلەرى دە الاڭداۋلى. سپورت – ول وبلىستىڭ ەكونوميكالىق جانە الەۋەتىنىڭ ايناسى ەكەنىن ەسكەرسەك، ورال سپورتىنىڭ ايناسىنىڭ شاڭىن سۇرتەتىن باسشى كانەكەي؟ قازاق "ايەل باستاعان كوش وڭباس" دەيدى. سپورت ەر-ازاماتتىڭ قىزمەتى. وسى سالانى دوڭگەلەنتىپ اكەتەتىن ايبىندى ازامات، جىگەرلى جىگىتتەر جايىقتىڭ جاعاسىندا دا جەتىپ ارتىلادى.

ەركىن ورازباەۆ