الماتىدا بەلگىلى تەاتر جانە كينو اكتەرى يۋري پومەرانتسەۆتىڭ قۇرمەتىنە ەسكەرتكىش اشىلدى، دەپ جازادى Almaty.tv تەلەارناسىنان ۇلاعات ارعىن مەن ەرنات بولاتبەك.
اڭىز ادام – ساحنا ساڭلاعى كورەرمەنگە «يۆان گروزنىي»، «ءبىزدىڭ سۇيىكتى دارىگەر»، «اتامەكەن» فيلمدەرى ارقىلى جاقسى تانىس. ونەرگە ءومىرىنىڭ 77 جىلىن ارناعان ازامات ءومىرىنىڭ سوڭىنا دەيىن ساحنادان تۇسكەن جوق. سالتاناتتى ءىس-شاراعا شىعارماشىلىق زيالى قاۋىم وكىلدەرى مەن قوعام قايراتكەرلەرى قاتىستى.
عاسىرعا جۋىق عۇمىر جاساعان يۋري پومەرانتسەۆ ءومىرىنىڭ سوڭىنا دەيىن كورەرمەننىڭ ىستىق ىقىلاسىنا بولەنىپ كەتتى. كينودا سومداعان 300-دەن استام ءتۇرلى وبرازى كەڭەستىك كينەماتوگرافيانىڭ التىن قورىندا ساقتاۋلى. كوپشىلىك رەجيسسەرلىك ەتكەن قويىلىمدارىن دا جاقسى بىلەدى. بۇگىنگى ەسكەرتكىشتىڭ اشىلۋ سالتاناتىنا قالا اكىمى ەربولات دوساەۆ تا كەلىپ، قۇتتىقتاۋىن جەتكىزدى.
«بۇل – الماتى قالاسى مەن ونىڭ مادەنيەتى ءۇشىن ماڭىزدى وقيعا. يۋري بوريسوۆيچ پومەرانتسەۆكە ارنالعان ەسكەرتكىشتىڭ اشىلۋىنا قاتىسۋ مەن ءۇشىن ەرەكشە قۇرمەت. ول – ءوز كاسىبىنە، كورەرمەنىنە، تەاترعا ادال بولا ءبىلدى. بۇگىنگى قۋانىشتارىڭىز قۇتتى بولسىن»، – دەدى الماتى قالاسىنىڭ اكىمى ەربولات دوساەۆ.97 جاسىنا دەيىن سپەكتالدە ويناعان پومەرانتسەۆكە ءماتىن جاعى قيىنعا تۇسپەيتىن دەيدى بىلەتىندەر. جاتتاپ تا المايتىن. ارىپتەستەرى «ساحناعا شىققاندا، ول ايتار ءسوزىن جان دۇنيەسىنەن شىعاراتىن» دەپ ەسكە الدى.
«مەن وعان تاڭعالاتىنمىن، ول عاجاپ ادام ەدى. 98-99 جاسىندا ساحنادا تۇرىپ 3 ساعات سويلەيتىن. 100 جاسىنا دەيىن ساحنادا وينادى. بۇگىنگى ەسكەرتكىش – جاقسى باستاما»، – دەدى قازاقستاننىڭ ەڭبەك ەرى ءاسانالى ءاشىموۆ.قول ءمۇسىن قالاداعى لەرمونتوۆ اتىنداعى ۇلتتىق ورىس دراما تەاترى عيماراتىنىڭ الدىنا قويىلدى. پومەرانتسەۆ وسى ونەر ورداسىندا ءومىرىنىڭ سوڭىنا دەيىن ەڭبەك ەتكەن ەدى. ءمۇسىن نۇرلان سماعۇلوۆ قورىنىڭ قولداۋىمەن ورناتىلدى. بۇل قازاقستاندىق مەتسەناتتىڭ الماتى جۇرتشىلىعىنا سىيلاعان ءتورتىنشى ەسكەرتكىشى.
«مەن يۋري پومەرانتسەۆپەن 60 جىل بىرگە جۇمىس ىستەدىم. ول رەجيسسەرلىك ەتكەن 5 سپەكتاكلدە باستى ءرولدى سومدادىم. ءومىرىن تۇگەلدەي ساحناعا، تەاترعا ارناعان تۇلعالار نەكەن-ساياق. يۋري سول سيرەكتەردىڭ قاتارىندا. مەن ونى تۋما تالانت دەپ باعالار ەدىم»، – دەيدى قر ەڭبەك سىڭىرگەن ءارتىسى گەننادي بالاەۆ.يۋري پومەرانتسەۆ – ۇلى وتان سوعىسىنا دا قاتىسقان ارداگەر. كوزى تىرىسىندە «ەرلىگى ءۇشىن» مەدالىمەن، II دارەجەلى وتان سوعىسى وردەنىمەن ماراپاتتالعان. بۇگىنگى سالتاناتتى جيىنعا جەرگىلىكتى اسكەري باسقارۋ ورگاندارىنىڭ اسكەري قىزمەتشىلەرى مەن راديو-ەلەكترونيكا اسكەري ينجەنەرلىك ينستۋتتىڭ كۋرسانتتارى دا قولداپ كەلدى.
