كەلەڭسىز جايت نۇرسۇلتان نازارباەۆ حالىقارالىق اۋەجايىندا بولعان
ايگىلى "دوس مۇقاسان" توبىنىڭ ءانشىسى مۇرات قۇسايىنوۆ اۋەجاي قىزمەتكەرىنە قول كوتەرىپ، دەنساۋلىعىنا زيان كەلتىردى، دەپ حابارلادى "ەير استانا" اۋەكومپانياسىنىڭ ءباسپاسوز قىزمەتى.
ءباسپاسوز قىزمەتىنىڭ مالىمەتىنشە، ءانشىنىڭ ارەكەتى جولاۋشىلارعا قاۋىپ توندىرگەن.
"ەكيپاج مۇشەلەرى ونى ۇشاققا وتىرعىزۋدان باس تارتقان. ءانشى اۋەكومپانيا قىزمەتكەرلەرىنىڭ كوزىنشە جولاۋشىلارعا قىزمەت كورسەتۋ ءبولىمى باسشىسىنىڭ ماڭدايىنا قاتتى سوققى جاساپ، ونىڭ دەنساۋلىعىنا زيان كەلتىردى", - دەپ حابارلادى اۋەجاي قىزمەتكەرلەرى.
"ەير استانا" اۋەكومپانياسى جولاۋشىلاردىڭ زاڭعا قايشى ارەكەتىنە مۇلدە جول بەرمەيتىنىن ءمالىم ەتتى.
كومپانيا زارداپ شەككەن قىزمەتكەرىنە بارلىق كومەكتى كورسەتەتىنىن اتاپ ءوتىپ، "دوس مۇقاسان" توبىنىڭ مۇشەسى زاڭ الدىندا ءتيىستى جازاسىن الاتىنىن ءمالىم ەتتى.
"اۋەكومپانيا نۇر-سۇلتان قالاسى اۋەجايىنداعى پوليتسيا بولىمىنە مۇرات قۇسايىنوۆتى جاۋاپقا تارتۋ جانە سوتقا دەيىنگى تەرگەۋ جۇرگىزۋ جونىندە ارىز ءتۇسىردى", - دەيدى اۋەكومپانيانىڭ ءباسپاسوز قىزمەتى.
Sputnik.