مەديتسينالىق ساقتاندىرۋ قورى قاراعاندى وبلىسىندا ديۋشەن بۇلشىقەت ديستروفياسى بار ءتورت بالانى ەمدەۋگە 414 ميلليون تەڭگەدەن استام قاراجات بولەدى.
ديۋشەن بۇلشىقەت ديستروفياسى – ديستروفين اقۋىزىنىڭ ءوندىرىسىن كودتايتىن گەندەگى مۋتاتسيادان تۋىندايتىن سيرەك اۋرۋ. بۇل بۇلشىقەت تالشىقتارىنىڭ جەتىسپەۋشىلىگىنە اكەلەدى، ولار السىرەيدى جانە زاقىمعا سەزىمتال بولادى.
قاراعاندى وبلىسىندا بۇل اۋرۋعا ءتورت بالا شالدىققان. ولاردىڭ ەكەۋى، 16 جانە 17 جاستا، قالالىق العاشقى مەديتسينالىق-سانيتارلىق كومەك ورتالىعىندا ەسەپتە تۇر. ولار بۇلشىقەت تىندەرىن قالپىنا كەلتىرۋگە جانە قوزعالىس بەلسەندىلىگىن ۇزارتۋعا باعىتتالعان ەم الادى. ەمدەۋ ءۇشىن قولدانىلاتىن نەگىزگى دارىلەردىڭ ءبىرى – "اتالۋرەن", ول بۇلشىقەت تالشىقتارىن قالپىنا كەلتىرەدى. وسى جىلى ەمحانالار جالپى قۇنى 414 ملن تەڭگەدەن اساتىن وسى قاراجاتتىڭ 4,5 مىڭعا جۋىق قۇتىسىنا تاپسىرىس بەرگەن. اۋرۋدان تولىق ايىعۋ مۇمكىن ەمەس.
– ەمدەۋ وسىنداي پاتسيەنتتەردىڭ ءومىر ءسۇرۋ ساپاسىن جاقسارتۋعا باعىتتالعان. تەراپيا پاتسيەنتتەردىڭ قوزعالىس بەلسەندىلىگىن ۇزارتاتىن، سونداي-اق بۇلشىقەت كۇشى مەن جۇرەك-وكپە قىزمەتىن جاقسارتاتىن قابىنۋعا قارسى يممۋنومودۋلياتسيالىق اگەنتتەردى قامتيدى، – دەيدى قالالىق مساك ورتالىعىنىڭ باس پەدياترى ولگا كونونوۆا. – بۇل جەردە اتا-انالاردىڭ ءدارى-دارمەكتەردى قابىلداۋ رەجيمىن ساقتاۋى، جىبەرىپ الماۋى وتە ماڭىزدى. ءدارى-دارمەكتەردى توقتاتۋ ناۋقاستىڭ جاعدايىنىڭ ناشارلاۋىنا اكەلەدى.
ديۋشەن بۇلشىقەت ديستروفياسى بار ناۋقاستار تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە قاجەتتى ءدارى-دارمەكتەرمەن قامتاماسىز ەتىلەدى.
