بيىل 1 شىلدەدە وماننان الماتىعا تىكەلەي اۋە رەيسى اشىلعاننان كەيىن شەتەلدىك تۋريستەر ءجيى كەلە باستادى، دەپ حابارلايدى Almaty.tv.
ساپار باعدارلاماسىندا الماتىنىڭ ەڭ تانىمال كورىكتى جەرلەرى، شوپينگ جانە قالانىڭ ۇزدىك مەكەمەلەرى بويىنشا گاستروتۋر بار.
«الماتى تاياۋ شىعىس ەلدەرىنەن كەلگەن كاسىپكەر تۋريستەر مەن قاراپايىم ساياحاتشىلار اراسىندا ۇلكەن تانىمالدىلىققا يە بولا باستادى. ءبىز وماننان كەلگەن قوناقتاردى قۇشاق جايا قارسى الامىز، ولاردىڭ ساپارى جاعىمدى ءارى ەستە قالارلىق بولاتىنىنا سەنىمدىمىز. قابىلدانعان شارالاردىڭ ارقاسىندا الماتىعا تۋريستىك دەستيناتسيا رەتىندە قىزىعۋشىلىق ارتىپ كەلەدى، ءبىز بۇل جۇمىستى جالعاستىرىپ جاتىرمىز»، – دەدى الماتى قالاسى تۋريزم باسقارماسىنىڭ باسشىسى عاليا توقسەيىتوۆا.
ول «الماتى-ماسكات» باعىتى بويىنشا جاڭا رەيستى اشۋدىڭ ماقساتى قازاقستان مەن وماننىڭ تۋريستىك الەۋەتىن دامىتۋ، ەكى ەلدىڭ اراسىنداعى ساۋدا-ەكونوميكالىق جانە مادەني بايلانىستاردى نىعايتۋ ەكەنىن ايتتى. ونىڭ سوزىنشە، تۋريزم باسقارماسى الماتى قالاسىن حالىقارالىق نارىقتاردا بەلسەندى تۇردە ىلگەرىلەتۋدە. مىسالى، تاياۋ شىعىس ەلدەرىنەن تۋريستەردى تارتۋ ءۇشىن كاتار، ءباا، ساۋد ارابياسى جانە وماننىڭ ءىرى قالالارى بويىنشا روۋد-شوۋ ۇيىمداستىرىلدى. بىلتىر الماتى تۋريزم باسقارماسىنىڭ وكىلدەرى Dubai – Arabian Travel Market 2022 كورمەسىنە قاتىستى.
ايتا كەتەرلىگى، پاندەميا توقتاعان ساتتەن باستاپ الماتىدا تۋريستەر كوبەيە باستادى. 2022 جىلى مەگاپوليسكە كەلگەن ءاربىر ءتورتىنشى تۋريست شەتەلدىك. 2022 جىلى الماتىدا شەتەلدىك تۋريستەر سانى 417 مىڭ ادامعا جەتتى. بيىل ءبىرىنشى توقساندا قالاعا باسقا ەلدەردەن 400 مىڭنان استام تۋريست كەلگەن.
بۇگىندە الماتىدان الەمنىڭ كەز كەلگەن جەرىنە ۇشۋعا بولادى. ۇشۋ كەستەسىندە 23 ەلگە رەيس بار. اتاپ ايتساق، رەسەي، گرۋزيا، وڭتۇستىك كورەيا، ءباا، ۇلىبريتانيا جانە ت.ب. شەتەلدىڭ 38 قالاسىنا تىكەلەي رەيستەر اشىلعان.
