جەتىسۋ وبلىسى مەن قىتايداعى ىلە-قازاق اۆتونوميالى وبلىسى اراسىندا ەكونوميكالىق قارىم-قاتىناس جاندانادى

جەتىسۋ وبلىسى مەن قىتايداعى ىلە-قازاق اۆتونوميالى وبلىسى اراسىنداعى ىنتىماقتاستىق بايلانىستار جاندانادى. بۇگىن وبلىس اكىمى بەيبىت يساباەۆتىڭ تالدىقورعاندا قىتايلىق دەلەگاتسيامەن كەزدەسۋى بارىسىندا بىرنەشە ماڭىزدى قۇجاتتارعا قول قويىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى. جەتىسۋ وبلىسىنا قحر شىڭجاڭ – ۇيعىر اۆتونوميالى رايونىنىڭ ىلە-قازاق اۆتونوميالى وكرۋگى پارتكومىنىڭ حاتشىسى يان سيۋلي باستاعان دەلەگاتسيا ارنايى كەلدى. قىتايلىق تاراپپەن كەزدەسۋگە وبلىس اكىمى بەيبىت يساباەۆپەن بىرگە ونىڭ ورىنباسارلارى، بىرقاتار باسقارما باسشىلارى، «قورعاس – شىعىس قاقپاسى» ارنايى ەكونوميكالىق ايماعىنىڭ باسشىلىعى  قاتىستى. جيىندا وبلىس اكىمى الدىمەن رەسمي قوناقتارعا جىلى لەبىزىن ءبىلدىرىپ، ولارعا وبلىستىڭ ستراتەگيالىق باعىتتارى مەن ينۆەستيتسيالىق مۇمكىندىكتەرى جايلى بايانداپ بەردى. - ءبىزدىڭ جەر جاناتى جەتىسۋعا قوش كەلدىڭىزدەر! وزدەرىڭىزبەن بۇگىن جۇزدەسىپ وتىرعانىمىزعا قۋانىشتىمىن جانە كەلگەندەرىڭىزگە العىسىمدى بىلدىرەمىن. بۇگىنگى كەزدەسۋ ەكى تاراپتىڭ بايلانىستارىن ودان ءارى جەتىلدىرۋگە وڭ ىقپال ەتەدى دەپ ويلايمىن. جەتىسۋ وبلىسى - ينۆەستيتسيالىق مۇمكىندىگى زور ايماق. وڭىردە 5 ستراتەگيالىق باعىت بويىنشا، اتاپ ايتقاندا اگروونەركاسىپ كەشەنىن دامىتۋ، كولىك جانە لوگيستيكا، تۋريزم، بالامالى ەنەرگەتيكا جانە ونەركاسىپ، ونىڭ ىشىندە جەر قويناۋىن پايدالانۋدى دامىتۋ سالالارىنا جاڭا ينۆەستورلار تارتۋ، ءوڭىردىڭ ينۆەستيتسيالىق الەۋەتىن ارتتىرۋ جۇمىستارىن جۇرگىزىپ كەلەمىز، - دەپ اتاپ وتكەن بەيبىت يساباەۆ وسى سالالاردىڭ ارقايسىسىنا قىسقاشا توقتالىپ ءوتتى. سونىڭ ىشىندە «قورعاس» شەكارا ماڭى ايماعىنىڭ مۇمكىندىكتەرىنە ەرەكشە نازار اۋداردى. وبلىس باسشىسى ءوز سوزىندە قىتايلىق كومپانيالاردى ءوڭىرىمىزدىڭ الەۋەتتى سالالارىنا، ياعني ءوڭىر ەكونوميكاسىنا ينۆەستيتسيا سالۋعا شاقىردى. مۇنداي ينۆەستيتسيانىڭ ەكى جاقتى ىنتىماقتاستىق اياسىن كەڭەيتۋدەگى ماڭىزى ەلەۋلى بولماق. ءوز كەزەگىندە ىلە-قازاق اۆتونوميالى وكرۋگى پارتكومىنىڭ حاتشىسى يان سيۋلي جەتىسۋ وبلىسىنىڭ اۋىل شارۋاشىلىعىنا، سونىڭ ىشىندە تامشىلاتىپ سۋارۋ تەحنولوگياسىن ەنگىزۋگە، جىلىجاي شارۋاشىلىعىن دامىتۋعا ۇلەس قوسۋعا نيەتتى ەكەندىكتەرىن ايتتى. سول سياقتى ونەركاسىپ، تۋريزم سالالارىندا دا بىرلەسىپ كوپ جۇمىس جاساۋعا بولاتىنىنا توقتالدى. جانە شەكارالىق بەكەتتەردىڭ وتكىزۋ قۋاتىن ارتتىرۋدىڭ مۇمكىندىكتەرىن قاراستىرۋ ماسەلەسىن دە اتاپ ءوتتى. قورىتا كەلگەندە مۇنىڭ بارلىعى ەكى ءوڭىردىڭ ەكونوميكاسىن دامىتۋعا ىقپال ەتەتىن باستامالار ەكەنىن جەتكىزدى. جيىن سوڭىندا قوس تاراپ بىرلەسىپ، بىرنەشە قۇجاتقا قول قويىلدى. اتاپ ايتقاندا، قازاقستاننىڭ جەتىسۋ وبلىسى مەن قحر شىڭجاڭ – ۇيعىر اۆتونوميالى رايونىنىڭ ىلە-قازاق اۆتونوميالىق وبلىسى اراسىنداعى ساۋدا-ەكونوميكالىق ىنتىماقتاستىق تۋرالى شەكتى كەلىسىمگە جەتىسۋ وبلىسى اكىمىنىڭ ورىنباسارى ەرنات ءبازىل مەن ىلە-قازاق اۆتونوميالىق وبلىسى ۇكىمەتىنىڭ اتىنان كەنجەحان دالەلبەك قول قويدى. سونىمەن بىرگە جەتىسۋلىق دەلەگاتسيانىڭ وسى جىلدىڭ مامىرىندا قىتايعا بارعان ساپارىندا قورعاس قالاسىندا وتكىزىلگەن بىرلەسكەن جيىننىڭ حاتتاماسىنا دا قول قويىلدى. جانە دە جيىن سوڭىندا ەكى تاراپتىڭ ءوزارا ىنتىماقتاستىق بايلانىستارىنىڭ ناقتى قادامدارىن تالقىلايتىن جۇمىس توبى قۇرىلىپ، ونىڭ قۇرامىن بەكىتىلدى. ەندى ەكى جاقتى قارىم-قاتىناستى نىعايتۋعا باعىتتالعان ناقتى كومپانيالار تاراپىنان قولعا الىناتىن ناقتى جوبالاردى ىسكە اسىرۋدى وسى جۇمىس توبى ۇيلەستىرەتىن بولادى. جالپى ىلە-قازاق اۆتونوميالى وبلىسىنىڭ دەلەگاتسياسى كەشەدەن بەرى «نۇر جولى» وتكىزۋ پۋنكتىنىڭ، «قورعاس» اەا قىزمەتىمەن، پانفيلوۆ اۋدانىنىڭ اۋىل شارۋاشىلىعىنىڭ اياق الىسىمەن تانىسىپ كورگەنىن اتاپ ءوتۋ كەرەك.