بۇگىن – اسا كورنەكتى مەملەكەت جانە قوعام قايراتكەرى دىنمۇحامەد احمەتۇلى قوناەۆتىڭ ومىردەن وتكەن كۇنى. 30 جىل بۇرىنعى قايعىلى كۇندى ەسكە الىپ، ەر ەڭبەگىن ەرەكشە اتاپ وتكەن الماتىلىقتار قوناەۆ اتىنداعى بيۋستكە گۇل شوعىن قويدى، ۇنسىزدىك مينۋتىن ارناپ، ەستەلىكتەر ايتتى، دەپ حابارلايدى Almaty.tv.
زامانىنىڭ زاڭعار تۇلعاسى دەپ تانىلعان قوناەۆتىڭ ساياسات پەن وندىرىستەگى ەڭبەگىن ەل جاقسى بىلەدى. ديماش احمەتۇلى بيلىك باسىندا بولعاندا قازاقستاندا 68 جۇمىسشى كەنتى پايدا بولعان. ەلدەگى ونەركاسىپ شامامەن 9 ەسەگە، اۋىل شارۋاشىلىعى 6,2, ال قۇرىلىس 8 ەسەگە ءوستى.
– ورتالىق كوميتەت بيۋروسىنىڭ ماجىلىسىندە تەك تسيرفمەن سويلەسەتىن. ينجەنەرلەرمەن كوپ كەڭەسەتىن. ناعىز ينجەنەر! جۇمىسىنا ادال ەدى. يدەياسى كوپ بولاتىن، – دەدى مەملەكەت جانە قوعام قايراتكەرى سەرىك ءابدىراحمانوۆ.قوناەۆتىڭ «اكادەميك» اتاعى ءۇشىن تولەنەتىن 340 سوم اقىدان باس تارتقانى، ءتيىستى قاراجاتتى بالالار مەن جاس عالىمدارعا باعىتتاعانى بەلگلى. ەل ىشىندە ەردىڭ اتى اتالسا، اۋەلى ونىڭ بىلىكتىلىگى، كىسى كوزىنە كۇلىپ قاراپ، جىلى شىراي تانىتاتىنى ءسوز بولادى. «قوناەۆتىڭ كوزىن كوردىم» دەگەندەردىڭ كوبى قايراتكەردىڭ قاراپايىمدىلىعىن ايتادى. قاپساعاي دەنەلى، ەڭسەلى ادامنىڭ بويىنداعى ۇلتتىڭ بولمىسى مەن بۇلا كۇشىنىڭ بۋىرقانىپ جاتقانىن جەتكىزەدى. ال ساياساتكەرلىگىنەن بۇرىن عىلىمداعى بىلىكتىلىگى ءبىلىنىپ تۇراتىن ديماش احمەتۇلى الماتىدا سەلدەن قورعايتىن بوگەت سالدى، ونەر مەن ءبىلىم وشاقتارىن اشتى، اۆتو، اەرو جانە تەمىرجول ۆوكزالىنىڭ بوي كوتەرۋىنە مۇرىندىق بولدى. بۇگىندە مەگاپوليستىڭ ماقتانىشىنا اينالعان «قازاقستان»، «دوستىق»، «الماتى» سىندى قوناقۇيدى تۇرعىزدى. سول كەزدەگى ەل استاناسىن بىلاي قويعاندا، كۇللى رەسپۋبليكانىڭ ونەركاسىبىن ورلەتتى.
– اللا بەرەكەسىن بەردى، سول جىلدارى 1 ملن پۇت استىق جينالىپ، قامبالارعا سىيدىرا الماعان سوڭ، شۋ اۋدانىنداعى بىرلىك اۋىلىنان تاۋلىگىنە 80 توننا بيدايدى كەپتىرەتىن ەلەۆاتور سالدىرعان، – دەدى قر جۋرناليستەر وداعىنىڭ مۇشەسى جۇماحان چەكاەۆ.ساياساتكەر، قايراتكەر، عالىم قوناەۆ تۋراسىندا ەل ايتادى، تسيفر سويلەيدى. قوناەۆ – قارۋ-جاراق جيناۋدى جاقسى كورگەن. كوللەكتسياسىندا ەل بىلە بەرمەيتىن جالعىز دانالى مىلتىعى كوپ. وزگە ەلدىڭ باسشىلارىنان 480-گە تارتا وتتىعى سىيعا كەلگەن.
– اعامىز وتە اقكوڭىل، جۇمساق ادام ەدى. بىزگە، جاقىندارىنا ەرەكشە مەيىرىمدى ەدى. قاي-قايسىمىزدىڭ دا ءبىلىم-عىلىمعا بەرىلىپ، كوپ وقىعانىمىزدى قالادى. «تالاپ پەن دورەكىلىكتى، بەيمازالىق پەن ىسكەرلىكتى شاتاستىرىپ الماڭدار» دەپ ءجيى ايتاتىن، – دەدى د. قوناەۆ اتىنداعى حالىقارالىق قوردىڭ پرەزيدەنتى ەلدار قوناەۆ. – ءبىر كۇنى زۋحرا شاريپوۆنانىڭ قۇلاعىنا الدەنە دەپ سىبىرلادى. مەن قاسىندا تۇردىم. سوسىن ديماش احمەتۇلى بىزبەن قوشتاسىپ كەتتى. سويتسەك، «سەنىڭ تاماعىڭدى ساعىنىپ ءجۇرمىن. بۇگىن ءوزىڭ تۇشپارا جاساشى» دەگەن ەكەن، – دەپ ەسكە الادى د. قوناەۆتىڭ مەدبيكەسى ءاليا بەلگىباەۆا.ەل ىشىندە ديماش احمەتۇلىنىڭ 50 جىل 6 اي 2 كۇن وتاسقان جۇبايىمەن جاراسىمدىلىعى ءجيى ايتىلادى. اكادەميك اياۋلى جارىنىڭ قازاسىنان كەيىن 2 جەتى ۇيدەن شىقپاعان. دۇنيەدەن وزار الدىندا زۋحرا شارىپقىزى «ماڭگىلىك ۇيقىم تىنىش بولسىن دەسەڭ، باقيلىق عۇمىرىڭدا دا قاسىمدا بولشى» دەپ تىلەك ايتقان ەكەن. سوڭعى سۇحباتىنىڭ بىرىندە وسىنى ايتىپ، جاساۋراعان جانارىن جاسىرا تەرىس اينالعان قوناەۆتىڭ دا ومىردەن وتكەنىنە 30 جىل تولدى.
