سۋپەر مەسسي، سەن ۇلى فۋتبولشىسىڭ!!!!!!!!!!!!!!!!!!!!!!!!!!
كەشە عانا وتكەن چەمپيوندار ليگاسىنىڭ كەزەكتى ويىنىندا بارسەلونانىڭ ءوزى اتتاس كلۋبى وزىندەي داڭقتى اعىلشىننىڭ "ليۆەرپۋلىن" قابىلداپ، 3:0 ەسەبىمەن تاس-تالقان ەتتى. بۇل ويىندا ەكى دوپتى لەونەل مەسسي سوقتى. ايتپاعىمىز ەكى دوپ ەمەس،ەكىنشى دوپ! قاقپادان ارقان بويى الىس جاتقان نۇكتەدەن الدىنا كولدەنەڭ تىزىلگەن تەمىر توسقاۋىلدى وراپ ءوتىپ، قاقپانىڭ سول "توعىزدىعىنا" عانا ەنە الاتىن دوپتى مەسسي سول نۇكتەگە قولمەن قويعانداي - ساداقتىڭ وعىنداي قادادى!!! بۇل تەك ۇلى فۋتبولشى ورىنداي الاتىن ونەر ەدى. سۋپەر مەسسي سۋپەر گول سوقتى تاعى دا!
تاعى دا دەيتىنىمىز - بۇل مەسسيدىڭ "بارسەلونا" جەيدەسىن كيگەننەن بەرگى 600-ءشى گولى ەدى! عالاماتى عاجاپ! سۇمدىق! كەرەمەت! ارينە، داڭقتى پەلە "سانتوستا" ءجۇرىپ 1000 گول سوقتى-اۋ دەيمىن. بىراق پەلەنىڭ زامانى مەن بۇگىنگى فۋتبولدىڭ اراسى ادام بالاسى ايعا ۇشقانداي الشاق....
بۇل ويىننىڭ بارىسىن اڭگىمەلەپ بەرۋدەن اۋلاقپىن. ونى فۋتبولسۇيەر جاندار تۇگەل كوردى. ايتپاعىم باسقا. ءومىردىڭ بار سالاسىندا تالانتتى جانداردى تاۋىپ، تاربيەلەۋ قوعامنىڭ ۇلى مۇراتى. ونەردە دە، عىلىمدا دا، سپورتتا دا... وسىنى ايتامىن دا ءوز ەلىمە، ءوز ۇلتىما قارايمىن. قارقىن ناشار . قارىم ورتا. ۇمتىلىس باياۋ. بىزدە ودان گورى ەلدى كىم باسقارادى، ۇرى-قارىنىڭ سانى قانشا، كىم ۇلتىمىزدى، ۇلتتىق قادىر-قاسيەتىمىزدى كوبىرەك تاپتايدى دەگەن تاقىرىپقا باس قاتىرۋ باسىم.
سپورتتى الايىق. سۋعا جۇزۋدەگى امريكا بالاسى مايكل فەلپس، بوكستەگى مەكسيكا شۇناعى ساۋل الۆارەس، فۋتبولداعى ارگەنتينا ارعىماعى لەونەل مەسسيلەردى تاۋىپ، تاربيەلەۋدىڭ ورنىنا ەريچ-مەريچتەردى قازاق قىپ اۋرەمىز. كەشە عانا ەۋروپادا ايدى اسپانعا شىعاردى دەگەن "قايرات" فۋتزال كومانداسىن تۇگەلىمەن بۇگىن اپارىپ برازيليا قۇراماسى قىلساق قاتەلەسپەيمىز! جەڭىل اتلەتيكاعا جۇزدەرىنەن كۇن ۇيالاتىن ءتورت-بەس كەنيالىقتى جەرسىندىرىپ جاتىر دەيدى... ماقتاعان "استانا" فۋتبول كلۋبىنىڭ قۇرامى دا بەت باستىرارداي. وزگە سپورت تۇرىنەن ۇلتتىق قۇراما ساپى دا جەرگە قاراتقانداي. باپكەرلەرگە ءوز ۇلاندارىمىزدى تاۋىپ تاربيەلەۋدەن گورى ءسىز بەن ءبىزدىڭ سالىققا جيناعان اقشامىزعا سىرتتان سپورتشىلاردى كوتەرە ساتىپ الۋ وڭاي بوپ تۇر. داۋىل اقىن يسا بايزاقوۆ پا ەدى ; "ەل بولسا ەر تۋعىزباي تۇرا المايدى!" دەپ كوكىرەگىن جارا ۇرانداعان، سول سەرتتى ءسوزدى دە تەرىسكە شىعارا باستاعانىمىزعا از ۋاقىت وتكەن جوق!
بارىنە قوزعاۋ سالعان سۋپەرمەسسي عوي! ول دا ءجون. وسىلاي تالانتتى جاندار جارق ەتىپ،شاڭىمىزدى قاعىپ تۇرماسا، توبەدەن ساۋلاعان توپىراقتان ەكى كوزىمىز عانا سىعىرايىپ كورىنگەنى كورىنگەن... مەن مەسسيدى بۇرىن دا ۇلى فۋتبولشى اتاندىرعانمىن. بىرەۋلەر ونى كريشتيان رونالدۋمەن قاتار قويعىسى كەلەدى. راس،ەكەۋى دە عاجاپ ويىنشى. بىراق رونالدۋ بارىنە تالانت، ەڭبەكقورلىق، ماقساتكەرلىكپەن جەتسە، مەسسي -- سيقىرلى، سيقىرشى، تابيعاتىنان وسىلاي عاجاپ بوپ تۋعان تۇلعا! ول سوندىقتان دا سۋپەرمەسسي!!!!!!!!
"سەن سۋپەرمەسسيسىڭ، لەونەل! سەن ۇلى فۋتبولشىسىڭ!" بۇل ساعان بىرجاقتاعى قازاق بالاسىنىڭ بەرگەن باعاسى.... ال، توبىقتاي ءسوزدىڭ ءتۇيىنى -- ءبىزدىڭ ۇلتقا دا وسى مەسسي سەكىلدى تابيعاتىنان عاجاپ ۇل مەن قىز كەرەك! ءومىردىڭ كەز-كەلگەن سالاسىندا. ولاي بولسا جان-جاعىمىزعا كوزدى كەڭ اشىپ قاراپ جۇرەيىك، قانداستار! قازاققا دا الەم الدىندا الار ابىروي اتاۋلى كوپ بولمايدى!
