مەملەكەت باسشىسى قاسىم-جومارت توقاەۆ قازاقستاندىقتاردى ەڭبەك كۇنىمەن قۇتتىقتادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
«قۇرمەتتى وتانداستار! سىزدەردى ەڭبەك كۇنىمەن شىن جۇرەكتەن قۇتتىقتايمىن! بۇل – مەملەكەتىمىزدىڭ تۇراقتى دامۋىنا جاسامپاز ىسىمەن ۇلەس قوسىپ كەلە جاتقان ناعىز ەڭبەكقور جانداردى ۇلىقتاۋعا ارنالعان ماڭىزدى مەرەكە. ولار تۋعان ەلدىڭ جارقىن بولاشاعى ءۇشىن كۇن سايىن تىنباي ەڭبەك ەتىپ، وتانشىلدىقتىڭ وزىق ۇلگىسىن كورسەتىپ ءجۇر. «ادال ازاماتقا» ءتان ەڭبەكقورلىق، ىسكەرلىك، جاۋاپكەرشىلىك، بىلىمپازدىق جانە جاقسىدان ۇيرەنۋ، جاماننان جيرەنۋ سىندى اسىل قاسيەتتىڭ ءبارى شىنايى ەڭبەك ادامىنىڭ بويىنان تابىلادى. سوندىقتان ءوز ءىسىنىڭ مايتالماندارى قاشاندا قوعامنىڭ نازارىندا بولۋعا ءتيىس. ال، جاستارىمىز سولارعا قاراپ بوي تۇزەۋى كەرەك»،—دەدى پرەزيدەنت.قاسىم-جومارت كەمەلۇلى ادال ەڭبەكتىڭ بۇكىل جەتىستىككە باستايتىنىن اتاپ ءوتتى.
«حالقىمىز «ەڭبەك – ادامنىڭ كوركى، ادام – زاماننىڭ كوركى» دەپ بەكەر ايتپاعان. شىن مانىندە، ادال ەڭبەك – بۇكىل جەتىستىكتىڭ باستاۋى، تابىسقا جەتۋدىڭ كىلتى. مەملەكەت وسى باستى قاعيدات بارلىق جەردە سالتانات قۇرۋى ءۇشىن ءبارىن جاسايدى. مەن ادىلەتتى قازاقستاندى ەڭبەكقور، ادال ازاماتتار عانا قۇرا الاتىنىنا كامىل سەنەمىن. بارشاڭىزعا زور دەنساۋلىق، باق-بەرەكە تىلەيمىن!»—دەپ ءسوزىن تۇيىندەدى ول.
ۇقساس جاڭالىقتار
