قازاقتىڭ ءبىرتۋار ۇلدارى. بۇگىن - بەيىمبەت مايلين مەن مالىك عابدۋللين دۇنيەگە كەلگەن كۇن

بۇگىن – قازاقتىڭ كورنەكتى جازۋشىسى، اقىن، دراماتۋرگ بەيىمبەت مايلين مەن قازاق سوۆەت جازۋشىسى، سوۆەت وداعىنىڭ باتىرى مالىك عابدۋلليننىڭ تۋعان كۇنى. بەيىمبەت مايلين - پروزا، پوەزيا، دراماتۋرگيا سالاسىندا بىردەي قالام تارتقان تۇلعا. «بايدىڭ قىزى»، «ءرازيا قىز»، «قاشقىن كەلىنشەك»، «زايكۇل»، «مارجان»، «وتىرىككە بايگە»، «حان كۇيەۋى» «كەمپىردىڭ ەرتەگىسى»، «ءبولىس»، «مىرقىمباي» پوەمالارىنىڭ، 25-كە جۋىق پەسا، ليبرەتتو، ستسەناريلەردىڭ، «ازامات ازاماتوۆيچ» رومانىنىڭ اۆتورى. ونىڭ «قىزىل جالاۋ»، «قوڭسىلار» اتتى روماندارى اياقتالماي قالعان. ايتا كەتەيىك، جازۋشىنىڭ 74 بۇركەنشىك ەسىمى بولعان. «ءۇش بايتەرەكتىڭ» ءبىرى – بەيىمبەت مايلين 1938 جىلى جازىقسىز تۇتقىندالىپ، ساياسي رەپرەسسيانىڭ قۇربانى بولدى. مالىك عابدۋلليننىڭ كوركەم شىعارماداعى تىرناق الدى تۋىندىلارى ديۆيزيالىق، مايداندىق گازەتتەردە جارىق كوردى. شىعارمالارى جەكە جيناق بولىپ، سوعىستان كەيىن جاريالاندى. «مەنىڭ مايدانداس دوستارىم»، «التىن جۇلدىز»، «مايدان وچەركتەرى»، «سۇراپىل جىلدار» اتتى كىتاپتارىنا ەنگەن اڭگىمە، وچەركتەرىندە م.عابدىللين مايدان ءومىرىن سۋرەتتەپ، جاۋىنگەر تۇلعاسىن، سوۆەت ادامدارىنىڭ ۇلى وتان سوعىسى كەزىندەگى قاھارمانداردىڭ بەينەسىن سۋرەتتەدى. لەنين وردەنى، قىزىل تۋ، ەڭبەك قىزىل تۋ، قىزىل جۇلدىز، ۇلى وتان سوعىسى وردەندەرىمەن ناگرادتالعان. «قازاق حالقىنىڭ باتىرلار جىرى» كىتابى اۆتورلارىنىڭ ءبىرى.