پرەزيدەنت قاسىم-جومارت توقاەۆتىڭ توراعالىعىمەن قاۋىپسىزدىك كەڭەسىنىڭ كەزەكتى وتىرىسى ءوتتى، دەپ حابارلايدى "ادىرنا" ۇلتتىق پورتالى.
وندا ۇلتتىق قاۋىپسىزدىك ستراتەگياسىن ىسكە اسىرۋدىڭ نەگىزگى تاسىلدەرىن جاڭارتۋ ماسەلەلەرى تالقىلاندى. مەملەكەت باسشىسى قارالىپ جاتقان ماسەلەلەردىڭ الەمدەگى كۇردەلى گەوساياسي جاعدايعا بايلانىستى قازاقستاننىڭ ەكونوميكالىق جانە اسكەري الەۋەتىن نىعايتۋ تۇرعىسىنان ەرەكشە ماڭىزدىلىعىن اتاپ ءوتتى.
سونىمەن قاتار پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆتىڭ ەسەبى تىڭدالىپ، بىرقاتار ءتيىستى مەملەكەتتىك ورگانداردىڭ باسشىلارى اقپارات بەردى.
پرەزيدەنت توقاەۆ ۇلتتىق قاۋىپسىزدىككە قاۋىپ توندىرەتىن نەگىزگى سىن-قاتەرلەرگە وبەكتيۆتى تالداۋ جاساپ، ولاردىڭ الدىن الۋ شارالارىن ازىرلەۋ قاجەتتىگىن ايتتى. مەملەكەت باسشىسى ازاماتتار مەن، تۇتاستاي العاندا ،مەملەكەتتىڭ قاۋىپسىزدىگى ماسەلەلەرى ولاردىڭ قىزمەتىنىڭ باسىم باعىتى رەتىندە ۇكىمەت پەن بارلىق ۆەدومستۆولاردىڭ نازارىندا بولۋى ءتيىس ەكەنىن اتاپ ءوتتى.
وتىرىس قورىتىندىسى بويىنشا، ۇلتتىق مۇددەنى قورعاۋ جانە ۇلتتىق قاۋىپسىزدىككە تونەتىن قاتەرلەردى باسقارۋ جۇيەسىنىڭ تيىمدىلىگىن ارتتىرۋعا باعىتتالعان شەشىمدەر قابىلداندى.
"ادىرنا" ۇلتتىق پورتالى
